ပူးပေါင်းဆောင်ရွက်မှု ဒေါ်စု ကျေးဇူးတင်

ကိုပေါက် | အင်္ဂါနေ့၊ ဇူလိုင်လ ၁၉ ရက် ၂၀၁၁ ခုနှစ် ၁၉ နာရီ ၀၄ မိနစ်
နယူးဒေလီ (မဇ္ဈိမ) ။ ။ ၆၄ နှစ်မြောက် အာဇာနည်နေ့ အစီအစဉ်များ အစအဆုံး ချောမွေ့စွာ ဆောင်ရွက်နိုင် ခဲ့သဖြင့် အာဏာပိုင်များကို ဒေါ်အောင်ဆန်းစုကြည်က ကျေးဇူးတင်ကြောင်း ပါတီပြောခွင့်ရ ဦးဉာဏ်ဝင်းက
ပြောသည်။

အင်္ဂါနေ့နေ့လည် ၁ နာရီခန့်တွင် အာဇာနည်ဗိမာန်သို့ လူပရိသတ် ၃ ထောင်ကျော်ကို ဦးဆောင်ကာ ဒုတိယအကြိမ် သွားရောက်ဂါရဝပြုပြီးအပြန် ပါတီခေါင်းဆောင်အချို့နှင့် နေအိမ်အတွင်း ပြန်လည်တွေ့ဆုံရာ၌ ဒေါ်အောင်ဆန်းစုကြည်က ပြောကြားခဲ့ခြင်း ဖြစ်သည်။

“သက်ဆိုင်ရာ တာဝန်ရှိတဲ့သူတွေနဲ့ အမျိုးသားဒီမိုကရေစီအဖွဲ့ချုပ်က တွေ့ဆုံညှိနှိုင်းပြီးတော့ ဆောင်ရွက်တဲ့အတွက် တဖက်မှာလည်း တာဝန်ရှိတဲ့သူတွေက မိမိတာဝန်ကို ကျေပွန်စွာ ထမ်းဆောင်နိုင်သလို အဖွဲ့ချုပ်ဘက်ကလည်း အာဇာနည်ကုန်းမှာ ငြိမ်းချမ်းစွာ သွားရောက် ဂါရဝပြုနိုင်တဲ့အတွက် နှစ်ဦးနှစ်ဖက် အကျိုးရှိတယ်။ ဒီအတွက်
ကျေးဇူးတင်ကြောင်းနဲ့ ဝမ်းသာကျေနပ်ကြောင်း ပြောကြားပါတယ်” ဟု ဦးဉာဏ်ဝင်းက မဇ္ဈိမကို ပြောသည်။


မည်သည့်ကိစ္စမဆို လိုအပ်သော တွေ့ဆုံညှိနှိုင်းဆောင်ရွက်ခြင်းဖြင့် လုပ်ငန်းအောင်မြင်နိုင်ပြီး ယနေ့ကိစ္စမှာ နမူနာကောင်း တခုအဖြစ် ဒေါ်အောင်ဆန်းစုကြည်က မှတ်ယူသည်ဟု ဆိုသည်။

အစိုးရသစ်က အာဇာနည်နေ့ အခမ်းအနားသို့ ဗိုလ်ချုပ်အောင်ဆန်း၏ သမီးအဖြစ် ဒေါ်အောင်ဆန်းစုကြည်ကို အင်္ဂါမနက် ၈ နာရီခွဲတွင် အကြိုအပို့အစီအစဉ်ဖြင့် တက်ရောက်စေခဲ့ခြင်း ဖြစ်သည်။

နေ့လည် ၁၁ နာရီတွင် ဗဟန်းမြို့နယ် NLD ရုံးချုပ်၌ ကျင်းပသည့် အခမ်းအနားတွင် အထွေထွေ အတွင်းရေးမှူး
ဒေါ်အောင်ဆန်းစုကြည် တက်ရောက်၍ အမှာစကားပြောရာ၌ အာဇာနည်ဟူသည့် အဓိပ္ပာယ်ကို ဖွင့်ဆိုရှင်းပြခဲ့သည်။

“အာဇာနည်ဆိုတဲ့ စကားလုံးရဲ့ အဓိပ္ပာယ်တွေ ပြောသွားတာပေါ့။ အာဇာနည်ဆိုတာ ကွယ်လွန်သွားရုံ ပြောတာ မဟုတ်ဘူး။ မြင့်မြတ်တဲ့ လုပ်ငန်း၊ မြင့်မြတ်တဲ့ စိတ်ထားနဲ့ ဆောင်ရွက်နိုင်မှုကို ဆိုလိုတာ။ အဲဒီတော့ မြင့်မြတ်တဲ့ စိတ်ထားရှိတဲ့သူတွေ၊ အာဇာနည်တွေ အများကြီးရှိဖို့ လိုအပ်တယ်လို့ ပြောသွားပါတယ်” ဟု ဦးဉာဏ်ဝင်းက ပြန်ပြောပြသည်။

တနာရီကြာ ကျင်းပသည့် အဆိုပါ အခမ်းအနားတွင် အာဇာနည်နေ့ အထိမ်းအမှတ် နံရံကပ် စာစောင်ပြပွဲနှင့် ကဗျာရွတ်ဖတ်ပွဲများလည်း ထည့်သွင်း ကျင်းပခဲ့သည်။

ဧည့်ပရိသတ် ၄ ထောင်ခန့် တက်ရောက်ကြသည့် အဆိုပါအခမ်းအနားသို့ ရန်ကုန်မြို့ရှိ နိုင်ငံခြားသံရုံးများမှ သံအရာရှိများလည်း တက်ရောက်ကြောင်း လုံခြုံရေး တာဝန်ယူပေးခဲ့သည့် တာဝန်ခံ ကိုစိုးထွန်းက မဇ္ဈိမကို
ပြောသည်။

“ ရုံးခန်းထဲတင် မကတော့ဘူးလေ။ ရုံးပြင်မှာကလည်း ထောင်ကျော်ရှိနေတယ်။ ဒါ ကျနော်တို့ဘက်ခြမ်းနော်။ မျက်နှာချင်းဆိုင်ဘက် အခြမ်းမှာလည်း လူတွေက အများကြီးပဲဗျ။ ဒီအခမ်းအနားပြီးရင် အန်တီတို့က ကားနဲ့ထွက်မှာ။ အဲဒီမှာ သတင်းထောက်တွေရော လူအုပ်ကြီးက အဲဒီဘက်ကို ပြေးလိုက်သွားမှာ။ အဲလောက်ဖြစ်နေတော့ ကျနော်တို့လည်း စိုးရိမ်တာပေါ့” ဟု သူက ပြောသည်။

အခမ်းအနား ကျင်းပနေစဉ် လူ ၇ဝ ကျော်ရှိ လူအုပ်တအုပ် လမ်းတလျှောက် ချီတက်လာသည်ကို တွေ့ရ၍ စိုးရိမ်မိသော်လည်း ၎င်းတို့မှာ တိုင်းရင်းသား စည်းလုံးညီညွတ်ရေးပါတီ တစည မှဖြစ်ပြီး နှုတ်ဆက်လက်ပြ၍ အာဇာနည်ကုန်းဘက် ချီတက်သွားတော့မှ စိတ်အေးရသည်ဟုလည်း ကိုစိုးထွန်းက ပြောသည်။

သူက ဆက်ပြီး “ကျနော်တို့ ဘယ်လောက်စိုးရိမ်ရသလဲဆိုတာ နားလည်လားဗျ။ အန်တီတို့ကား ထွက်လည်းထွက်ရော ဟိုဘက်ဒီဘက် ကားလမ်းတွေက ပြုံဆင်းလာတော့ မနည်းကို မေတ္တာရပ်ခံရတာ။ အဲဒီတော့မှ အန်တီတို့ကား ထွက်သွားနိုင်ပြီး လူထုက ကျန်ခဲ့တာ။ အဲဒီတော့မှ ၄ ယောက်တတွဲ တန်းပြီးတော့ ချီတက်ကြတာ” ဟု ဆိုသည်။

ဒေါ်အောင်ဆန်းစုကြည်မှာ ပါတီလူကြီးများ၊ လွှတ်တော်ကိုယ်စားပြုကော်မတီမှ ခေါင်းဆောင်များ၊ ဝါရင့်နိုင်ငံရေးသမားကြီးများနှင့်အတူ အာဇာနည်ဗိမာန်သို့ ဒုတိယအကြိမ် သွားရောက်ဂါရဝပြုပြီး နေအိမ်သို့
ပြန်ရောက်ခဲ့သည်။

ကျန်ရှိနေသော လူထုပရိသတ်မှာ ညနေအထိ အစီအစဉ်အတိုင်း ၄ ယောက်တတွဲ တန်းစီကာ ဝင်ရောက် အလေးပြုခဲ့ကြသည်။

“တာဝန်ရှိတဲ့သူတွေနဲ့ ပူးပေါင်းဆောင်ရွက်နေပါတယ်။ ဘာမှ အနှောင့်အယှက်၊ အတားအဆီး မရှိပါဘူး။ အာဏာပိုင်တွေက သတ်မှတ်ထားတဲ့ စည်းကမ်းအတိုင်း ရှာတာဖွေတာတော့ ရှိတာပေါ့၊ လုံခြုံရေးအရ။ အားလုံးကို ဝင်ခွင့်ပေးနေပါတယ်။ လူက ၄ ထောင်၊ ၅ ထောင် ကျော်တယ်” ဟု လုံခြုံရေးတာဝန်ကျ လူငယ်တဦးက ပြောသည်။

လူထုချီတက် အလေးပြုပွဲအား လူငယ်ကွန်ယက်အဖွဲ့ဝင်များက ပူးပေါင်းစီစဉ်ခဲ့ခြင်း ဖြစ်သည်။

မနက်ပိုင်းတွင် လာရောက်သည့် လူငယ်အချို့အား ခြောက်ထပ်ကြီး ဘုရားအနီး တာဝန်ကျ လုံခြုံရေးများက ရပ်တန့် စစ်ဆေးမှုများသာ ပြုလုပ်ခဲ့သည်။

၁၉၈၈ တွင် မြန်မာနိုင်ငံသို့ ပြန်ရောက်လာသော ဒေါ်အောင်ဆန်းစုကြည်မှာ အာဇာနည်နေ့ အခမ်းအနားသို့ တက်ရောက် ဂါရဝပြုခွင့်မှာ ၂၀၀၂ ခုနှစ်အထိ ၈ ကြိမ်သာ ရရှိခဲ့သည်။

၂ဝ၁၁ တွင် သားဖြစ်သူ ကိုထိန်လင်းနှင့်အတူ ဇူလိုင်လ ၁၂ ရက်နေ့တွင် အာဇာနည်ဗိမာန်သို့ သွားရောက် ဂါရဝပြုခွင့် ရရှိခဲ့သေးသည်။Rest of your post