ရွေးကောက်ပွဲ မ၀င်ပေမဲ့ NLD ရုံးချုပ် ပိတ်ဖို့မရှိ
22 April 2010
အမျိုးသားဒီမိုကရေစီ အဖွဲ့ချုပ် (NLD) အနေနဲ့ ၂၀၁၀ ရွေးကောက်ပွဲ ဥပဒေအရ နိုင်ငံရေးပါတီအဖြစ် မှတ်ပုံမတင်ဘူး ဆိုပေမဲ့ ပါတီရုံးကို ပိတ်မှာ မဟုတ်သလို ပါတီအလံ၊ ပါတီဆိုင်းဘုတ်ကိုလည်း မိမိဘာသာ ဖျက်သိမ်းပေးမှာ မဟုတ်ဘူးလို့ ပါတီခေါင်းဆောင်တချို့က ပြောလိုက်ပါတယ်။ အပြည့်အစုံကို ဆက်သွယ်မေးမြန်းပြီး ကိုသားညွန့်ဦးက တင်ပြပေးထားပါတယ်။
အမျိုးသားဒီမိုကရေစီ အဖွဲ့ချုပ် အနေနဲ့ ဥပဒေအရ ပါတီတည်ရှိမှု ပျက်ပြယ်သွားမယ်ဆိုရင် အခြေအနေတွေကို ကိုင်တွယ်နိုင်အောင် စီမံခန့်ခွဲမှုဆိုင်ရာ အုပ်ချုပ်ရေး အဖွဲ့တရပ် ဖွဲ့ထားပါတယ်။ ဒါပေမဲ့လည်း NLD အနေနဲ့ သူ့ရဲ့ အဖွဲ့တည်ရှိမှုကိုတော့ မိမိဘာသာ ဖျက်သိမ်းပေးမှာ မဟုတ်ဘူးလို့ အဖွဲ့ချုပ် ခေါင်းဆောင်တဦးဖြစ်တဲ့ ဦးဝင်းတင်က ပြောပါတယ်။
“ကျနော်တို့က နိုင်ငံရေးပါတီ၊ ဖျက်သိမ်းမယ်၊ မဖျက်သိမ်းဘူးဆိုတာ သူတို့အပေါ်မှာသာ တည်တယ်၊ ကျနော်တို့နဲ့ ဘာမှမဆိုင်ဘူး။ ကျနော်တို့ ကိုယ့်ဘာသာလည်း ဘာမှ ဖျက်သိမ်းမပေးဘူး။ အလံချခြင်းတို့၊ ဆိုင်းဘုတ်ဖြုတ်ခြင်းတို့ ဘာမှမလုပ်ဘူး။ ကျနော်တို့လုပ်ငန်း ကျနော်တို့ လုပ်မယ်။ ဒါက ဒေါ်စုရဲ့ အမြင် သဘောထားတွေနဲ့လည်း ထင်ဟပ်ပြီးတော့ ဖြစ်တာလို့ ပြောချင်ပါတယ်။”
ဥပဒေ ကျွမ်းကျင်သူတဦးဖြစ်တဲ့ NLD ပြောခွင့်ရသူ ဦးဉာဏ်ဝင်းကလည်း လက်ရှိ ဥပဒေအတိုင်းဆိုရင် ပါတီ မှတ်ပုံမတင်ရင် အလိုအ လျောက် ပျက်ပြယ်တဲ့ သဘောပဲရှိပြီး အစုအဖွဲ့ ဆက်တည်ရှိနေမှုအပေါ် အရေးယူရမယ်ဆိုတဲ့ ဥပဒေ ဖော်ပြချက်မျိုး ဘာမှမ တွေ့ ရဘူးလို့ ပြောပါတယ်။
“ကျနော်တို့ ပြင်ဆင်မှု မလုပ်ဘူးဗျ၊ လုပ်စရာ မလိုဘူးလို့ ကျနော်တို့က သတ်မှတ်ထားတာ။ ဥပဒေအရ အလိုအလျောက် Cancel ဖြစ်တော့လည်း အလိုအလျောက် ဖြစ်ပေါ့။ ကျနော်တို့က ဒီအတွက် လိုက်လုပ်ပေးစရာ မရှိဘူး။”
အကယ်၍များ မေလ ၇ ရက်နေ့မှာ သူတို့က သူ့ဥပဒေအရ အလိုအလျောက် Cancel ဖြစ်တယ်၊ ပါတီဆိုင်းဘုတ်တွေ တင်ခွင့်မပေးဘူး၊ အလံတွေ တင်ခွင့်မပေးဘူး၊ ရုံးတွေ ဖွင့်ခွင့်မပေးတော့ဘူး ဆိုရင်ရော အန်ကယ်တို့ ဘာများ စဉ်းစားမှုရှိပါလဲ။
“အဲဒီလို ခွင့်မပေးဖို့ကိစ္စ ဘယ်ဥပဒေမှာမှ ကျနော်တော့ မတွေ့ဘူးဗျ။”
ဥပဒေမှာက ဘယ်လိုဆိုထားလဲခင်ဗျ၊ အကယ်၍ မေလ ၇ ရက်နေ့ကျရင် နိုင်ငံရေးပါတီ တရပ်အနေနဲ့ မရှိတော့ဘူးလို့ သဘော မသက်ရောက်နေဘူးလား။
“သက်ရောက်ပါတယ်။”
သက်ရောက်နေတော့ အဲဒါ သူတို့အနေနဲ့ တခြား Action တွေဘာတွေ လုပ်ရမယ်ဆိုတဲ့ ရည်ညွှန်းချက်တွေရော မရှိဘူးလားခင်ဗျ။
“အဲဒီရည်ညွှန်းချက်တွေလည်း ဥပဒေမှာ မရှိဘူး။”
ဦးဝင်းတင်ကတော့ အခုလက်ရှိ ရွေးကောက်ပွဲ ဥပဒေရော၊ ၂၀၀၈ ဖွဲ့စည်းပုံပါ ဥပဒေတွေဟာ မတရားတဲ့ ဥပဒေတွေ ဖြစ်တဲ့အတွက် သူတို့ရပ်တည်ချက် လုပ်ရပ်တွေကို ဒီဥပဒေတွေနဲ့ စံနှုန်းထား သတ်မှတ်တာမျိုး လက်မခံနိုင်ဘူးလို့ ဆိုပါတယ်။
“ကျနော်တို့ကတော့ ဥပဒေဘောင်အတွင်းမှာ ဆိုတာ ဘာလဲဆိုတော့ ကျနော်တို့က တရားဥပဒေ ဘောင်အတွင်းမှာ ရှိတယ်၊ ရပ်တည်တယ်။ ဒါပေမဲ့ ရွေးကောက်ပွဲ ၀င်မယ်တို့၊ ပါတီ မှတ်ပုံတင်မယ်ဆိုတဲ့ လူတွေရဲ့ ဥပဒေဘောင်အတွင်း ဆိုတာက ၂၀၀၈ ဥပဒေဘောင်အတွင်း၊ ၂၀၀၈ အခြေခံ ဥပဒေကနေ ချတဲ့ ဘောင်အတွင်း ဖြစ်မယ်။ ကျနော်တို့ကတော့ တရားဥပဒေ ဘောင်အတွင်းမှာ ရှိတယ်။ တရားမျှတခြင်း၊ လွတ်လပ်ခြင်းဆိုတဲ့ ဘောင်အတွင်းမှာ ရှိတယ်လို့ ကျနော်က ယူဆတယ်။”
အန်ကယ်တို့အနေနဲ့ အလံမချဘူး၊ ဆိုင်းဘုတ်ကိုလည်း မဖြုတ်ဘူး၊ ဒီအတိုင်းထားမယ်ဆိုရင် ၁၉၈၉ ခုနှစ်တုန်းက အန်ကယ်တို့ တကယ်တမ်း ကြွေးကြော်ပြီး လှုပ်ရှားခဲ့ကြတဲ့ မတရားတဲ့ ဥပဒေတွေကို ဆန့်ကျင်ရေးဆိုတဲ့ လမ်းကြောင်းပေါ်ကို ရောက်မသွားနိုင်ဘူးလား ခင်ဗျ။
“မတရားတဲ့ ဥပဒေတွေကတော့ ရှိနေပြီ။ ဒေါ်စုကနေပြီးတော့ ဒီဥပဒေတွေ ထွက်ကတည်းက ပြောခဲ့တဲ့စကား ၂ ခွန်း ရှိပါတယ်။ ဒီဥပဒေတွေက မတရားဘူး၊ မတရားဘူးဆိုရင် ကျနော်တို့က မတရားတဲ့ အမိန့်အာဏာ ဟူသမျှ ဖီဆန်ကြဆိုတဲ့ သဘောထား၊ လမ်းကြောင်း လုပ်ငန်းစဉ်ဟာ ကျနော်တို့ ရှိနေတဲ့ သို့မဟုတ် ဒီလမ်းစဉ်အတိုင်းပဲ ဆက်ပြီးတော့ ကိုင်စွဲဦးမယ်လို့ ဆုံးဖြတ်ရင် အထွေအထူး စဉ်းစားစရာ မလိုတော့ဘူး။ ဘာဖြစ်လို့လဲဆိုတော့ ဒီဥပဒေတွေက မတရားတဲ့ ဥပဒေတွေ ဖြစ်နေတာကိုး။
“သို့သော် ကျနော်တို့က အဲဒီဟာကို လုပ်ငန်းစဉ်အနေနဲ့ ကိုင်စွဲသေးသလား၊ ကိုင်စွဲလို့ ရသေးသလား၊ ကိုင်စွဲဦးမလား ဆိုတာကတော့လည်း အဓိက ဖြစ်နေပြန်တယ်ပေါ့ဗျာ။ ဘာဖြစ်လို့လဲဆိုတော့ ၀ိညာဉ်အားဖြင့်တော့ ကျနော်တို့ထဲမှာ ဒီအနှစ် ၂၀ ကာလပတ်လုံး ရှိခဲ့တယ်။ သို့သော် အဲဒါကို ကျနော်တို့ လှုပ်ရှားမှု အနေနဲ့ ကိုင်စွဲမလား၊ မကိုင်စွဲဘူးလား ဆိုတာကတော့ အဆင့်တဆင့်ဖြစ်မယ်၊ သို့မဟုတ်လည်း ကဏ္ဍသစ်တခု ဖြစ်ကောင်း ဖြစ်လိမ့်မယ်လို့ ကျနော် အဲဒီလိုပဲ ပြောချင်ပါတယ်။”
NLD အနေနဲ့ မေလ ၇ ရက်ကျော်လို့ ဥပဒေအရ အလိုအလျောက် ပါတီပျက်ပြယ်ချိန်မှာ ရှိထားတဲ့ အစုအဖွဲ့တွေနဲ့ လူထုအကျိုးပြုလုပ်ငန်း၊ လူမှုကယ်ဆယ်ရေး လုပ်ငန်းတွေကို လုပ်သွားမယ်လို့ ဆိုသလို တဘက်မှာလည်း နိုင်ငံရေးအရ ဆက်ရှိနေဦးမယ်လို့ ပြောပါတယ်။ ဒါပေမဲ့ ဒီအစုအဖွဲ့တွေနဲ့ နိုင်ငံရေးအရ ဘယ်လို ရပ်တည်လှုပ်ရှားမလဲ ဆိုတဲ့ အစီအစဉ် အသေးစိတ် အတိအကျကိုတော့ ပါတီခေါင်းဆောင်ပိုင်း ကြားမှာ သဘောထား ကျထားပုံ မရသေးပါဘူး။
http://www.voanews.com/burmese/2010-04-22-voa4.cfm
Thursday, April 22, 2010
တခါးများဖွင့်လှစ် ထားမည်။..NLD
Subscribe to:
Post Comments (Atom)
2 comments:
"ပြည်တွင်းစစ်မီး စတင်မီးမွေးသူ"
ခုပြည်တွင်းစစ် ဖြစ်လာမယ်ဆို မီးစတင်မွေးသူဟာ ဖက်ဆစ်စစ်ဗိုလ်ချုပ်တွေပဲ။ တရားနည်းလမ်းကျတဲ့ တောင်းဆိုမှုတွေကို လက်မခံဘဲ။ ပြည်ထောင်စုကြီးပြိုကွဲသွားမယ်ဆိုပြီး လိမ်ညာလာတာ အနှစ် ၄၀ ကျော်လို့ ၅၀ တောင် နီးလာပါပြီ။ စစ်သားတွေကိုလည်း လိမ်ညာပြီး သတ်ခိုင်း တိုက်ခိုင်းနေတာ ကြာပါပြီ။ အိမ်ကြက်ချင်း အိုးမည်းသုတ် ခွပ်ခိုင်းလာတာ အောက်ခြေ စစ်သားတွေ၊ ပေါ်တာပါတဲ့ ရွာသားတွေ သေကြတာလည်း များပါပြီ။ ဖက်ဆစ်စစ်ဗိုလ်ချုပ်တွေကတော့ အရက်သောက်မပျက်ပါပဲ။ သားတွေမြေးတွေဆို အပျော်ခန်းတွေမှာ ပျော်ချင်တိုင်းပျော်လို့။ ရဲဘော်တွေ ဗိုလ်ပေါက်စတွေတော့ ဗိုလ်ချုပ်တွေ သားသမီးတွေ "စိန်စီတဲ့ည" ဖန်တီးဖို့ သူတို့ အသက်တွေ ပေးလိုက်ရတာ မသိကြရှာဘူး။ တိုင်ပြည်ကာကွယ်တယ် ထင်ကြတုန်းပဲ။ ဘုန်းကြီး၊ ကျောင်းသား၊ အပြစ်မဲ့ ရွာသူရွာသားတွေ သတ်လာတာ များလှပါပြီ။
"ပြည်ထောင်စု ကုန်းပိုးပွဲ"
တစ်ခါက တိုင်းပြည်တစ်ပြည်မှာ ကုန်းပိုးပွဲ ကျင်းပသတဲ့။ ကုန်းပိုးပွဲမှာ လူ ၁၆ ယောက် ပါတယ်။ ၈ ယောက်က ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်၊ ရှမ်းတဲ့။ ကျန်တဲ့ ၈ ယောက်ကတော့ အစိမ်းကောင်တွေတဲ့။ ကုန်းပိုးပွဲဆိုတာ လူတွေက စက်ဝိုင်းပုံ မျက်နှာချင်းဆိုင် နေရာယူပြီး၊ အောက်ကတစ်ယောက်က ကုန်း (ခံတဲ့လူ)၊ နောက်တစ်ယောက်က ကုန်းထားသူရဲ့ ကျောမှာ ပိုး (စံတဲ့လူ) ပေါ့။ အထုပ်ကလေးတစ်ထုပ်ကို ကျောပေါ်တက်ထိုင်နေသူတွေက လက်ဆင့်ကမ်း ပစ်ကြတာပေါ့။ အထုပ်ဖမ်းတာ မမိဘဲ မြေကြီးပေါ်ကျသွားရင်။ အောက်က လူက အပေါ်တလှည့်တက်၊ အပေါ်က လူက အောက်တလှည့်ဆင်း ကုန်းပိုးပေးပေါ့။ အထုပ်ကလေးကို စက်ဝိုင်းပုံ နေရာယူထားတဲ့ အတိုင်း မြေကြီးပေါ် မကျ မချင်း။ လက်ဆင့်ကမ်းပစ်ပေးကြတာပေါ့။ အောက်ဆင်းပြီး ကုန်းမပိုးရအောင် သတိထားပြီး ပစ်ကြရတာပေါ့။ အောက်ကျရင် ဆင်းပြီး ကုန်းပိုးရမှာကိုး။ ခံရမယ့် အလှည့်လေ။
ခုကုန်းပိုးပွဲမှာတော့ ထူးခြားတာရှိတယ်ဗျ။ စရိုက်ကြမ်းတဲ့ အစိမ်းကောင်းတွေက ကစားပွဲ စည်းမျဉ်းကို ဆွဲထားတယ်ဗျ။ ကြိုတင်ပြီးတော့ပေါ့လေ။ တကယ်ကစားနေကျ စည်းမျဉ်းကတော့ အထုပ်ကို မိအောင် မဖမ်းနိုင်တဲ့ အပေါ်က လူက အထုပ်မြေကြီးပေါ်ကျသွားရင် သူက တလှည့် အောက်ကနေ ပိုးပေးရမှာပေါ့။ ခံရတဲ့ အလှည့်ပေါ့။ အောက်ကလူက တစ်လှည့်တက်ပြီး စံရတဲ့ အလှည့်ပေါ့။ ခု အစိမ်းကောင်းတွေ ဆွဲထားတဲ့ စည်းမျဉ်းက "အထုပ် အောက်ကျရင် အစိမ်းကောင်တွေ တက်စီး" ။ စည်းမျဉ်းက ဒါပဲ။ ဘယ်သူပစ်ပစ် မပစ်ပစ်၊ ဘယ်သူ့ကြောင့် ကျကျ မကျကျ။ အစိမ်းကောင် စံပဲ။ ခံ ဖို့ မပါဘူး။ တနည်းပြောရရင်။ "နိုင်လည်း နိုင်ရမယ်။ ရှုံးလည်း နိုင်ရမယ်" ဆိုတဲ့ စည်းမျဉ်းပေါ့ဗျာ။ ဒီလို စည်းမျဉ်းနဲ့ ကစားပွဲကို ၀င်ကစားကြရမယ့် ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်၊ ရှမ်း တွေကတော့ ခံရမယ့် အလှည့်ချည်းပေါ့ဗျာ။
ကျွန်တော်တို့ ဆီက "ပြည်ထောင်စု ကုန်းပိုးပွဲ" ဆိုတာ ဒီလို စည်းမျဉ်းနဲ့ ဥပဒေနဲ့ဗျ။ ဒီလို ကစားပွဲမျိုးကို ၀င်ပါချင်သူ မရှိတာ မဆန်းပါဗျာ။ ပြည်ထောင်စု ဆိုတာလည်း အဲလိုပါပဲ တန်းတူတဲ့ အခွင့်အရေးမှ မရှိရင် "ဘာလဲဟဲ့ ပြည်ထောင်စု" လိုပဲ မေးလိုက်ချင်ပါတော့တယ်။ ကိုလိုနီ လက်သစ်ဝါဒနဲ့ ပြည်ထောင်စု ဆိုတာ ဒါပါပဲ။
Post a Comment