အဆိပ်ပင်ကို ရေမလောင်းဘူးဗျို့ 

မြန်မာကို ပိတ်ဆို့မှု အမေရိကန်နဲ့ ကနေဒါ ရုပ်သိမ်းဖို့ အစီအစဉ်မရှိ
By ဗွီအိုအေ (မြန်မာဌာန)
မြန်မာနိုင်ငံမှာ အမျိုးသား ပြန်လည်သင့်မြတ်ရေးကို ရှေ့ရှုပြီး စစ်အစိုးရက လူ့အခွင့်အရေး လေးစား လိုက်နာရေး၊ နိုင်ငံရေး အကျဉ်းသားတွေ အားလုံး လွှတ်ပေးရေး၊ ဒီမိုကရေစီ အင်အားစုတွေ၊ တိုင်းရင်းသား ခေါင်းဆောင်တွေနဲ့ အနှစ်သာရရှိတဲ့ တွေ့ဆုံဆွေးနွေးမှုတွေအတွက် အခိုင်အမာ အရေးယူ ဆောင်ရွက်တာတွေ လုပ်လာအောင် တွန်းအားပေးတဲ့ အနေနဲ့ အမေရိကန် ပြည်ထောင်စုက တားဆီး ပိတ်ဆို့မှုတွေကို ဆက်လက် ထိန်းထားမှာ ဖြစ်တယ်လို့ အမေရိကန် နိုင်ငံခြားရေး ၀န်ကြီးဌာနက ဒီနေ့ ပြောဆိုလိုက်ပါတယ်။

မြန်မာနိုင်ငံမှာ စီးပွားရေး ချွတ်ခြုံကျနေရတာဟာ လူ့အခွင့်အရေး အကြီးအကျယ် ချိုးဖောက်နေတဲ့ စစ်အစိုးရ အပေါ်မှာ အခိုင်အမာ မူတည်နေတယ် ဆိုတာကို ကနေဒါ နိုင်ငံခြားရေး ၀န်ကြီးဌာနက သဘောတူတဲ့အကြောင်း မနေ့က ကြေညာချက် ထုတ်ပြန်လိုက်ပါတယ်။

ကနေဒါနိုင်ငံက စစ်အစိုးရအပေါ် အပြင်းထန်ဆုံး ဒဏ်ခတ်ထားတာကို ရုပ်သိမ်းပေးဖို့ အစီအစဉ် မရှိကြောင်း၊ မြန်မာနိုင်ငံမှာ လွတ်မြောက်ရေး၊ လူ့အခွင့်အရေး လေးစား လိုက်နာရေး၊ ဒီမိုကရေစီရေးတွေ ဖြစ်ထွန်း တိုးတက်အောင် နိုင်ငံတကာ မိတ်ဆွေတွေနဲ့အတူ ဘယ်လို ကူညီနိုင်မလဲ ဆိုတာကို ဒေါ်အောင်ဆန်းစုကြည်၊ NLD အမျိုးသား ဒီမိုကရေစီ အဖွဲ့ချုပ်နဲ့ တခြား ဒီမိုကရေစီ အင်အားစုတွေနဲ့ ဆွေးနွေးမယ့် အစီအစဉ်ကို ကြိုဆိုပါကြောင်း ကနေဒါ နိုင်ငံခြားရေး ၀န်ကြီးဌာနရဲ့ ကြေညာချက်မှာ ဖော်ပြထားပါတယ်။

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ဦးဆောင်တဲ့ အမျိုးသား ဒီမိုကရေစီ အဖွဲ့ချုပ်က မြန်မာနိုင်ငံအပေါ် စီးပွားရေး ပိတ်ဆို့မှုတွေနဲ့ ပတ်သက်ပြီး လေ့လာသုံးသပ်ချက် တစောင်ကို အင်္ဂါနေ့က ထုတ်ပြန်ခဲ့တဲ့အပေါ် အမေရိကန် ပြည်ထောင်စုက အခုလို မှတ်ချက်ပေးလိုက်တာပါ။

မြန်မာနိုင်ငံမှာ စီးပွားရေး ပိတ်ဆို့မှုဆိုင်ရာ စည်းကမ်းချက်တွေကို ဘယ်အချိန်မှာ ဘယ်လိုအခြေအနေတွေ အောက်ကနေပြီး ပြုပြင် မွမ်းမံနိုင်မယ် ဆိုတာကို သဘောတူညီမှု ရရှိနိုင်အောင် အမေရိကန် ပြည်ထောင်စု၊ EU ဥရောပသမဂ္ဂ အဖွဲ့ဝင် နိုင်ငံများ၊ ကနေဒါ၊ နယူးဇီလန်နဲ့ သြစတြေးလျ နိုင်ငံတို့ကို ညှိနှိုင်း ဆွေးနွေးသွားဖို့အတွက် အမျိုးသား ဒီမိုကရေစီ အဖွဲ့ချုပ်က တောင်းဆိုမယ်လို့ သူတို့ရဲ့ ကြေညာချက်မှာ ဖော်ပြထားပါတယ်။

ဒီလိုစဉ်းစားရာမှာ ဒီမိုကရေစီရေး၊ လူ့အခွင့်အရေးနဲ့ တောင့်တင်းခိုင်မာတဲ့ စီးပွားရေး အခြေအနေတွေကို ထည့်သွင်းစဉ်းစားဖို့ လိုအပ်တယ်လို့လည်း ဆိုပါတယ်။

အများရဲ့ လေးစားမှုကို ခံယူရရှိပြီးဖြစ်တဲ့ ပညာရှင်အဖွဲ့ တခုကနေ စီးပွားရေး ပိတ်ဆို့မှုတွေရဲ့ အကျိုးအပြစ်တွေကို လေ့လာ ဆန်းစစ်ပေးနိုင်မယ်ဆိုရင် အဲဒီဆွေးနွေးမှုတွေဟာ အများကြီး အထောက်အကူပြု၊ အကျိုးဖြစ်စေမယ်လို့ NLD ရဲ့ ကြေညာချက်မှာ ဖော်ပြထားပါတယ်။

အမေရိကန် ပြည်ထောင်စု မြန်မာ့အရေး လှုပ်ရှားမှုအဖွဲ့ (USCB) ကလည်း စစ်အစိုးရအပေါ် တားဆီး ပိတ်ဆို့မှုတွေကို အပြည့်အ၀ အကောင်အထည်ဖော်ဖို့ လိုနေသေးကြောင်း စစ်အစိုးရရဲ့ နိုင်ငံခြားငွေ ဘဏ်စာရင်းတွေကို ပိုပြီး ထောက်လှမ်းရင်းနဲ့ ချိတ်ပိတ်ဖို့ ဆက်လုပ်ဖို့ လိုအပ်နေသေးတယ်လို့ ဗွီအိုအေကို ပြောပြပါတယ်။

တချိန်တည်းမှာပဲ Burma Campaign (UK) ဗြိတိန်နိုင်ငံ မြန်မာ့အရေး လှုပ်ရှားမှု အဖွဲ့ကလည်း EU ဥရောပသမဂ္ဂ အနေနဲ့ ဧပြီလမှာ သက်တမ်းကုန်ဆုံးမယ့် စစ်အစိုးရ ခေါင်းဆောင်ပိုင်းအပေါ် ပစ်မှတ်ထားပြီး ဒဏ်ခတ်တာတွေကို သက်တမ်းတိုးပြီး ဆက်လက် ထိန်းသိမ်းထားသင့်တယ်လို့ မနေ့က တိုက်တွန်းလိုက်ပါတယ်။