ခွေးဝဲစားတွေကို သင်တန်းပေးနေကြပြီ..

စွမ်းအားရှင်များအား သင်တန်းပေးရန် စီစဉ်
အောင်ထက်/ ၂၂ မတ် ၂ဝ၁ဝ

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်း (ကြံ့ဖွံ့) ၏ လက်ကိုင်တုတ်ဖြစ်သော စွမ်းအားရှင်အဖွဲ့ကို မကြာမီလပိုင်းအတွင်းသင်တန်း များ ပေး ရန် အစီအစဉ်ရှိသည်ဟု စစ်ဖက်ရေးရာလုံခြုံရေးအဖွဲ့ (စရဖ) မြို့နယ်တာဝန်ခံတဦးက ပြောသည်။

မည်သည့်အချိန်၊ မည်သည့်နေရာ၌ သင်တန်းများ ပေးမည်ကိုမူ ၎င်းက ပြောကြားခြင်းမရှိပေ။
“ကျနော်တို့တုန်းက တောင်ဒဂုံမှာ သင်တန်းတက်ရတယ်။ ဒိုင်း၊ တုတ် ကိုင်တွယ်နည်း၊ ကိုယ်ခံပညာ နည်းနည်းသင်တယ်။ ရှေ့က တက်တဲ့လူက ဘယ်လို၊ နောက်က ညာသံပေးပြီးအော်တာက ဘယ်လိုနဲ့ သင်ပေးတာ” ဟု မြောက်ဥက္ကလာပမြို့နယ် စွမ်းအားရှင် လူငယ်တဦးက ပြောသည်။

စွမ်းအားရှင်အဖွဲ့ကို သက်ဆိုင်ရာ မြို့နယ် ကြံ့ဖွံ့နှင့် မယကတို့မှ တာဝန်ယူဖွဲ့စည်းထားခြင်းဖြစ်သည်။ စက်သုံးဆီဈေး စတင်ပြောင်းလဲ၍ လူထုအုံကြွမှုဖြစ်ပွားခဲ့သော ၂၀၀၇ သြဂုတ် (၆) ရက်နောက်ပိုင်း အရေးပေါ်အခြေအနေအရ ဖွဲ့စည်းခြင်း ဖြစ်သည်ဟု သိရသည်။

“ရယက ဥက္ကဋ္ဌတွေကို စကားပြောစက် အသုံးပြုခွင့် ပေးထားတာ အဲဒီအတွက်ပဲ။ အရေးအခင်းဖြစ်တာနဲ့ မယက ကနေ ရယကဥက္ကဋ္ဌဆီ စက်ပေါက်လိုက်တယ်။ ဥက္ကဋ္ဌက စွမ်းအားရှင် ရာအိမ်မှူးတွေကို စုစည်း၊ ပြီးတော့ (၁၅) မိနစ်အတွင်း မယကရုံး စုရပ်မှာ သွားဆုံကြရ တယ်။ အဲဒီက ကားတွေနဲ့ အုံကြွမှုဖြစ်တဲ့နေရာကို သွားကြတယ်။ တနေ့ (၅,၀၀၀) ကျပ်စား စွမ်းအားရှင်၊ (၃,၀၀၀) ကျပ်စား စွမ်းအားရှင်တွေဆိုပြီးရှိတယ်။ ဒါကလည်း လှုပ်ရှားမှုရှိမှ ရကြတာ” ဟု မယက ၀န်ထမ်းတဦးက ပြောသည်။

၂၀၀၇ ခုနှစ်အတွင်း သြဂုတ်လနှင့် စက်တင်ဘာလအတွင်း စက်သုံးဆီ ဈေးနှုန်းတက်သွားသည်ကို အကြောင်းပြု၍ ရန်ကုန်မြို့အနှံ့ ဖြစ်ပွားခဲ့သော ရဟန်းသံဃာနှင့် လူထုအုံကြွမှုကို ရက်ရက်စက်စက်နှိမ်နင်းရာတွင် စွမ်းအားရှင်အဖွဲ့ကို ထည့်သွင်းအသုံးပြုခဲ့သည်ဟု အဆိုပါဝန်ထမ်းက ပြောသည်။

ရယက အတွင်းရေးမှူးတဦးကလည်း “မြို့နယ်တိုင်း စွမ်းအားရှင်တွေရှိတယ်။ မြို့ပြ၊ မြို့လယ်တွေမှာတော့ ရယက စွမ်းအားရှင်တွေ ပဲရှိတယ်။ ရယက ရာအိမ်မှူးတွေထဲက (၅) ဦးကို မယကဆီ စာရင်းပို့ရတယ်။ အဲဒီမှာ မြို့နယ်အဆင့် ခေါင်းဆောင် (၂) ယောက် ရွေးချယ်ပြီး ခရိုင်စွမ်းအားရှင်အဖြစ် သတ်မှတ်တယ်။ ဒါကြောင့် မြိုနယ်တခုမှာ စွမ်းအားရှင် (၅၀) နဲ့ (၁၀၀) ကြားရှိနိုင်တယ်။ အိုးအိမ်မဲ့ ကျပန်း စွမ်းအားရှင်တွေကိုတော့ မြို့စွန်၊ မြို့သစ်တွေဖြစ်တဲ့ မြောက်ဒဂုံ၊ တောင်ဒဂုံ၊ သန်လျင်၊ ကျောက်တန်းမြို့နယ်တွေမှာ အများဆုံး တွေ့ရတယ်” ဟု ၎င်း၏ အတွေ့အကြုံကို ရှင်းပြသည်။

လက်ရှိအခြေအနေတွင် ဒဂုံမြို့သစ် မြောက်ပိုင်း၊ အမှတ် (၃၃) ရပ်ကွက်၊ ပင်လုံဈေးနှင့် (၁) ဖာလုံခန့်အကွာ ငမိုးရိပ်ချောင်း နံဘေးရှိ ကြံ့ဖွံ့အသင်းပိုင်မြေနေရာတွင် စွမ်းအားရှင် အိမ်ထောင်စုများ စုစည်းလျက် တည်ရှိနေကြသည်။

၎င်းအသင်းပိုင်မြေသည် အလျား ပေ (၃၀၀)၊ အနံ ပေ (၁၀၀) ဧရိယာရှိပြီး ကျူးကျော်တဲ (၃၀) ခန့်ရှိသည်။ ကြံ့ဖွံ့စည်းရုံးရေးမှူး ဦးမြင့်ဦးထံ နေအိမ်တလုံးလျှင် လစဉ် (၅,၀၀၀) ကျပ် အခွန်ပေးသွင်းရပြီး ထိုတဲတန်း၌ စွမ်းအားရှင် (၅၀) ဦးခန့် ရှိနိုင်သည်ဟု အမှတ် (၃၃) ရပ်ကွက်သားတို့က ပြောသည်။

ကြံ့ဖွံ့ကျူးကျော်တဲတန်း၏ (၂) ဖာလုံခန့်အကွာ၌ ရပ်ကွက်ကျူးကျော်တဲများ ရှိနေပြီး အဆိုပါနေရာ၌ နေထိုင်ခွင့်ရရန် အရွယ်ရောက်သူ တိုင်း စွမ်းအားရှင်အဖွဲ့သို့ မ၀င်မနေရ ၀င်ကြရသည်ဟု သိရသည်။ ၎င်းတို့သည် ငမိုးရိပ်ချောင်းနံဘေးရှိ အုတ်၊ ကျောက်စရစ်၊ သဲဒိုင်များ၌ အချို့လုပ်ကိုင်ကြပြီး အများစုမှာ ရန်ကုန်မြို့၏ ဆောက်လုပ်ရေး လုပ်ငန်းခွင်များတွင် ပန်းရန်၊ လက်သမား လုပ်ကိုင်ကြသည်ဟု သိရသည်။

ရယက အဖွဲ့ဝင်တဦး၏အဆိုအရ ဒဂုံမြို့သစ်မြောက်ပိုင်းသည် အခြားမြို့နယ်များထက် ထူးခြားစွာ စွမ်းအားရှင် ဦးရေ (၃၀၀) ခန့် ရှိနိုင်သည်ဟု သိရသည်။

အဆိုပါ စွမ်းအားရှင်များအား သင်တန်းများပေးရန် စီစဉ်နေခြင်းသည် ရွေးကောက်ပွဲ မတိုင်မီနှင့် ရွေးကောက်ပွဲ ကာလတလျှောက် လူထုအတွင်း သပ်လျှိုသွေးခွဲမှုများ ပြုလုပ်ရန် အချိန်ကိုက် စီမံခြင်းဖြစ်နိုင်သည်ဟု နိုင်ငံရေးအကဲဖြတ်များက သုံးသပ်နေကြသည်။
http://www.khitpyaing.org/news/March%202010/22310a.php