“၂၀၁၀ ကမ္ဘာ့ လူအခွင့်အရေး၏ တိုက်ပွဲနှစ်” မြန်မာ့သွေးအနီရောင် မညစ်စေနဲ့ ။ စစ်ကျွန်ဘ၀လွှတ်မြောက်ကြဖို့  တော်လှန်ှရေးသို့့ အသင့်ပြင်

Sunday, October 09, 2011

ပြည်သူ့လွှတ်တော်ဥက္ကဌကြီး ဒီမိုကရေစီ နည်းလမ်းကျအောင် လုပ်ဆောင်နိုင်မည်လား?

Via G-Mail 9/10/11
နအဖ အဖွဲ့ဝင် တပ်မတော်ခေါင်းဆောင်ဟောင်း General ကြီးအနေဖြင့် ၂၀၁၁ ခုနှစ်၊ စက်တင်ဘာလ (၁၅) ရက် ဒီမိုကရေစီနေ့တွင် ဒီမိုကရေစီနိုင်ငံ (သို့မဟုတ်) ဒီမိုကရက်တစ် လူ့ဘောင်အဖြစ် တည်ဆောက်ပြီး ဆင်းရဲမွဲတေနေသော မြန်မာနိုင်ငံအား ပြန်လည် ထူထောင်ရေးအတွက် တိုက်တွန်းသွားခဲ့သည်ကို ကြားသိရသည့်အတွက် စဉ်းစားဖွယ်ရာ ကိစ္စများ ပေါ်ပေါက်လာ၍ မေးမြန်းကြည့်ချင်စိတ် ပေါ်ပေါက်လာပါတယ်။ ယင်း၏ တင်ပြချက်တွင် ပြည်သူ့လွှတ်တော်အတွင်း ဒီမိုကရေစီနည်းလမ်းတကျ ကျင်းပပေးနေသည် ဟု ပြောဆိုပြီး ဒီမိုကရက်တစ် လူ့ဘောင်ကို တည်ဆောက်ရန် တိုက်တွန်းကြောင်း ပါရှိ ပါတယ်။
နှစ်ပေါင်း (၅၀) နီးပါး စစ်ကျွန်အဖြစ် ကျရောက်ခဲ့သည့် မြန်မာပြည်အတွက် ဒီမိုကရေစီ ပီပြင်ရေး (သို့မဟုတ်) ဒီမိုကရက်တစ်လူ့ဘောင် တည်ဆောက်နိုင်ရေးအတွက် မည်သည့် လုပ်ငန်းကို စတင်လုပ်ဆောင်သင့်သနည်း ဆိုတာကိုတော့ ရှင်းလင်းစွာ မပြောသွားပါဘူး။ ဒီမိုကရေစီ၏ အသက်သည် ပြည်သူများ၏ နိုင်ငံရေးရေချိန်၊ အခွင့်အရေး ပြောဆိုခွင့်အပေါ် တွင် ရှိနေပြီး Institution များ၏ ခိုင်မာမှုနှင့် ရင့်ကျက်မှုပေါ်တွင် မူတည်သည်ဟု မှတ်ယူ မိပါသည်။
လက်ရှိ အူကြောင်ကြောင် အခြေအနေတွင် Institution များ အသစ်ဖြစ်ထွန်းရေး အတွက် အချိန်များစွာ ယူနေရချိန်တွင် ရှိပြီး Institution များနှင့် Power Sector များကို စတင်ပြုပြင်ရန် လိုအပ်ပေမည်။ လက်ရှိ Setting တွင် ပထမအင်အားစု နိုင်ငံရေးပါတီများ၊ ဒုတိယအင်အားစု အစိုးရအဖွဲ့များ၊ တတိယအင်အားစု တပ်မတော်၊ စတုတ္ထအင်အားစု ပညာရပ်ကျွမ်းကျင် အစုအဖွဲ့များ၊ ပဉ္စမ လူမှုရေးအသင်းအဖွဲ့များ၊ ဆဌမ စီးပွားရေးအစုအဖွဲ့များ ဟု အကြမ်းဖျင်း ခွဲလို့ရပါမယ်။ ယင်းတို့ ကောင်းမှ လွှတ်တော်များ၏ စနစ်ပီပြင်နိုင်ပါလိမ့်မည်။
နိုင်ငံရေးပါတီများ
နိုင်ငံတကာတွင် နိုင်ငံရေးပါတီများ၏ ရပ်တည်မှုနှင့် နိုင်ငံရေး တတ်ကျွမ်းမှုများ၊ အစု အဖွဲ့ စနစ်ကျမှုများ အရှိန်ရနေပြီဖြစ်ပြီး လက်ရှိ မြန်မာနိုင်ငံတွင် သက်တမ်းရှိ တိုင်းရင်းသား စည်းလုံးညီညွတ်ရေးပါတီနှင့် NLD ပါတီ၊ မနေ့တစ်နေ့ကမှ ပေါ်လာသော အင်အားကြီးပြီး စနစ်မကျ၊ ပြည်သူမချစ်သော USDP နှင့် အခြားပါတီငယ်များသာရှိပြီး အခြေခံနိုင်ငံရေး စံ၊ စုဖွဲ့မှုနှင့် စီမံမှု ရရန်ကို ပင် အနည်းဆုံး ၃ / ၄ နှစ် အချိန် ယူရပေမည်။ ငွေကြေးခိုင်မာရေး အတွက် USDP နှင့် NLD တို့မှ အပ ပါတီငယ်များအတွက် အလှမ်းဝေးနေ ပါလိမ့်ဦးမည်။
လက်ရှိ USDP မှာ နအဖ၏ အမွေဖြင့် မည်မျှချမ်းသာ နေသနည်းဆိုသည်ကို ယင်းတို့ ကိုယ်တိုင် ဖြေနိုင်သလား၊ မဖြေနိုင်သလား မသိပါ။ စည်းရုံးရေး (ပါတီတွင်း၊ ပြည်သူ) ကောင်း မကောင်း ယင်းတို့ သိ မသိတော့ မပြောတတ်ပါ။ ကျွန်ုပ်တို့ အနေဖြင့် ပါတီ စည်းရုံးရေး မကောင်း သည်ကိုတော့ သိနေပါတယ်။
ပါတီတွင် ဗိုလ်ချုပ် အပြုတ်များ၊ ဝန်ကြီးအပြုတ်များ၊ ဆွဲခန့် (သို့မဟုတ်) မနိုင်မှာ ကြောက်၍ ခေါ်ခန့်သူများ၊ လုပ်စားသူများနှင့် ဘာမှန်း မသိသေးသူများ အများစု (ကောင်းသူများကို မဆိုလိုပါ) ပါဝင်နေကြပါတယ်။
ဗိုလ်ချုပ်အပြုတ်များ အနေဖြင့် တပ်မတော်ထဲတွင် တစ်ဘဝလုံး နေခဲ့ရ၍ ပြင်ပ၏ အခြေအနေ မှန်ကို သိရန် ခက်သလို ရပ်တည်ရေးအတွက် ဘာလုပ်ရမှန်း မသိကြပါ။ စစ်ပရိယာယ်နှင့် နိုင်ငံရေး ပရိယာယ် မတူသလို ယင်းတို့ ကျင်လည်ရာ အဖွဲ့အစည်းနှင့် နိုင်ငံရေး အဖွဲ့အစည်းတို့၏ လှုပ်ရှားမှုများ မတူညီကြပါ။
USDP အနေဖြင့် အမွေရ အာဏာရှိနေပြီး နိုင်ငံကို ကောင်းစွာတည်ဆောက်ရန် အခြေအနေ ပေးလျှက်နှင့် မတည်ဆောက်နိုင်ဘဲ ဖြစ်နေတယ်။ ပါတီ၏ သဘောထားနှင့် လွှမ်းမိုးမှုသည် အစိုးရအဖွဲ့ (ယင်းတို့တင်ထားတဲ့) အပေါ် မရှိသည့် အတွက်ကြောင့် အစိုးရအဖွဲ့အနေဖြင့် ပြည်သူအကြိုက် (ပါတီအား ပြည်သူအထင်ကြီးအောင်) မလုပ်နိုင်ချေ။
အစိုးရကလည်း (ယင်းတို့အခေါ်) အဘိုးကြီး ခေါ် သန်းရွှေ၏ ကြိုးဆွဲမှုကြောင့်လား၊ ယင်းတို့ ကိုယ်၌က ဘာလုပ်ရမှန်း မသိလို့လား လွှတ်တော်များကပဲ Check & Balance လုပ်ရမှာ ကြောက်နေလို့လား မသိ မြင်သာထင်သာ ပြောင်းလဲမှုများ မလုပ်ဘဲ၊ Public Figure ခေါ် လူစိတ်ဝင်စားစေသော၊ အထင် ကြီးစေသော အချက်များကိုသာ လုပ်ဆောင်ပြနေတာ တွေ့နေရတယ်။ NLD ခေါင်းဆောင် ဒေါ်အောင်ဆန်းစုကြည်၏ နိုင်ငံရေးအသိဖွင့် ခရီးစဉ်များ မထွက်ခွာမှီ အချိန်မှီ ချွေးသိပ်ကာ သဘောထားကြီးသယောင် ငြိမ်းချမ်းရေး (ခဏလောက် ဒေါ်စုငြိမ်လျှင်တောင် အကျိုးအမြတ်ရပြီဟု ခံယူကာ) အတွက် ဆိုပြီး တွေ့ဆုံဆွေးနွေးခဲ့တာကို တွေ့ရမှာပါ။ ဓါတ်ပုံတွေအရ နိုင်ငံခေါင်းဆောင် ဗိုလ်ချုပ်အောင်ဆန်း၏ပုံကို နောက်ခံထားပြီး လူအထင်ကြီး အောင် လုပ်ခဲ့ပြန်ပါတယ်။ အခန်းရဲ့ပုံစံကို မကြည့်ရ၍ မသိသေးတဲ့ အချက်က ယင်းသမ္မတ အခန်းထဲမှာ သမ္မတတွေရဲ့ ဓါတ်ပုံများကို ထားတယ်ဆိုရင် ဦးသန်းရွှေရဲ့ ဓါတ်ပုံကိုလည်း ထားဖို့ လိုပါတယ်။ ကြိုက်သည်၊ မကြိုက်သည်ကို ဘေးထား၊ သေချာတာကတော့ ဒီ နိုင်ငံကို နှစ် (၂၀) လောက် အုပ်ချုပ်ခဲ့ပြီး ဒီမိုကရေစီလမ်းကြောင်းကို ဖွင့်ပေးခဲ့တဲ့ (ဆန္ဒ ပါပါ မပါပါ၊ အကွက်ချချ၊ မချချ၊ ကမ္ဘာသိ လုပ်ပေးရတဲ့အတွက်၊ ဘယ်လိုမှ ပြန်ပြီး သူပါဝင်လို့ မရတဲ့) အဘိုးကြီး ပုံကို ထားဖို့ လိုပါတယ်။ ရှိရင်တော့ ကောင်းတာပေါ့။
ဦးရွှေမန်းကတော့ အာဘောင်အာရင်း သန်သန်နှင့် လွှတ်တော်အကြောင်း Marketing လုပ်နေလေရဲ့။ သူ့ဟာသူ ဘာဖြစ်ဖြစ် သေချာတာကတော့ လွှတ်တော်ဆိုတဲ့အရာ ပေါ်လာပါပြီ။ ဦးရွှေမန်းအနေနှင့် လွှတ်တော်နှင့် ရှေ့ဆက်ချီတက်မလား၊ အကွက်ချခံရတဲ့ ဘဝနှင့် ခေါင်းငုံ့ပြီး ကံစီမံရာပဲ နေမလား။ သူ့ရဲ့ဘဝကြောင်းအရနှင့် လက်ရှိ အခြေအနေအရ လွှတ်တော်ကို အသက်ရှိအောင်လုပ်မှ ရပ်တည်လို့ရမယ့် အနေအထားအကြောင့် လွှတ်တော်စနစ် ပီပြင်ရေးကို လုပ်ရပါလိမ့်မည်။
ဒီမိုကရေစီပီပြင်အောင်ဖော်ဆောင်မယ်ဆိုတဲ့ ဦးရွှေမန်းခင်ဗျား-
ဦးရွှေမန်းမှာ တပ်မဲ့ဖြစ်နေတာကို (အာဏာမရှိ) နိုင်ငံရေး နားလည်သူတွေ သိကြပါတယ်။ ပါတီမှာလည်း ဟန်ပြ ဒုဥက္ကဌဖြစ်နေတာကိုလည်း မဖွင့်ပြောနိုင်၊ အစိုးရကိုလည်း မစောင့်ကြည့်နိုင်၊ သူပြောနိုင်တာ စစ်ဗိုလ်တစ်မတ်သားပါတဲ့ ပြည်သူ့လွှတ်တော် ပရဝဏ်ထဲမှာ ပါပဲ။ ပြည်သူ့အသံ၊ လွှတ်တော် အသံတဲ့၊ သေချာတာလွှတ်တော်အသံ မြန်မာ့အသံကို ကျော်လွှားနိုင်ပါ့မလား။ ဦးရွှေမန်းဟာ ဆဒ္ဒဆင်မင်း ဇာတ်ခင်းတဲ့ ဦးကျော်ဆန်းကို မကျော်နိုင်ပါ။ ဦးရွှေမန်းက မီဒီယာများ လွှတ်တော်တွင် လွတ်လပ်စွာ သတင်းယူနိုင်တယ်လို့ ပြောပေမယ့် လွှတ်တော်ထဲမှာ ပြောတဲ့ အကြောင်းအရာများ ပြည်သူတွေထံ မရောက်ပါ။ နှစ်ချက် ဖြစ်နိုင်ပါတယ်။ ပြည်သူကို အသိမပေးရဲတဲ့ ဟန်ပြ ပါလီမန် (သို့မဟုတ်) အစိုးရ ရဲ့ စောင့်ကြည့်ခံ ပါလီမန် (အစိုးရကို စောင့်ကြည့်ရန် မတတ်နိုင်သော) ဖြစ်တာကြောင့်လား၊ ဒါမှ မဟုတ် Air Time charges များတဲ့ ရုပ်သံရဲ့ အရင်းဈေးမျှကို မတန်တဲ့ အကြောင်းအရာများ ဖြစ်လို့လား မသိပါဘူး။ အစိုးရ ပြောရေးဆိုခွင့်ပိုင်ရှင် ဦးကျော်ဆန်းရဲ့ အမိန့်မရလို့လည်း ဖြစ်နိုင်ပါတယ်။
ဦးရွှေမန်းခင်ဗျား-
မပြည့်စုံသေးတဲ့ ဖွဲ့စည်းပုံ အခြေခံဥပဒေ / ၂၀၀၈ ဖွဲ့စည်းပုံ အခြေခံဥပဒေကို မကျေ ညက်တာလား၊ မလုပ်တတ်တာလားတော့ မသိဘူး ဖွဲ့စည်းပုံအခြေခံဥပဒေ ဖောက်ဖျက်မှုကို မသိလို့လား၊ ကြောက်လို့လား မသိ၊ ယနေ့အထိ ရသုံးမှန်းခြေ ငွေစာရင်း Bill ကို အစိုးရမှ တင်သွင်းထားတာ မတွေ့ရ သေးပါ။ အမတ်မင်းများကော သိရကောင်းမှန်း သိကြပါရဲ့လား။ မသိပါလို့ပဲ မှတ်ယူပါသည်။ လမ်းပေါက်ဖာ၊ တမံပေါက်ဖာဖို့နှင့် ဆေးခန်း မျက်နှာကျက် လဲပေးရေး အမေးတွေနှင့် မယောင်ရာ ဆီလူး အဆိုတွေများတဲ့ လွှတ်တော်မှာ ဦးရွှေမန်း ဝတ်ရုံကြီး ဝတ်ပြီး ဘာတွေကို ဒီမိုကရေစီစနစ် ဖြစ်တည်ရေး လုပ်နေပါသလဲ။ ကြိုက်ကြိုက် မကြိုက်ကြိုက် ၂၀၀၈ ဥပဒေအရ အာဏာသုံးရပ် ပိုင်းပြီး နေပါတယ်။ ပြန်ဆက်လို့ မရပါ။ ဆက်သူသည် သမိုင်းတရားခံ ဖြစ်ပါလိမ့်မည်။ ရသလောက် အခွင့်အရေးထဲမှ ဒီမိုကရေစီ ပုံဖော်နိုင်ပါသည်။ လုပ်လဲ လုပ်တတ်မယ်ဆိုရင်ပေါ့။ ပြည်သူ့ဆန္ဒ၊ လွှတ်တော် ဆန္ဒတဲ့။ ပြည်သူ့ဆန္ဒကတော့ ကောင်းမွန်တဲ့ အုပ်ချုပ်မှုစနစ်အောက်မှာ နိုင်ငံဖွံ့ဖြိုးမှုကို အတူတကွ ဆောက်တည်ပြီး ဒီမိုကရက်တစ်လူ့ဘောင်ကို အရောက်လှမ်းချင်ကြပါတယ်။ ဦးရွှေမန်း ချီတက်ရဲ ပါသလား။ ဝေဖန်ခြင်း မဟုတ်ပါ။ တိုက်တွန်းခြင်း ဖြစ်ပါတယ်။ ပြည်သူ့ဆန္ဒကို လုပ်ရဲပါ့မလား၊ လုပ်မလား ဆိုတာကို သမိုင်းက စောင့်ကြို မှတ်တမ်းတင်နေပါမည်။ ဆက်လုပ်ပါ ရဲဘော်..။
အစိုးရနှင့် နီးစပ်တဲ့ အသိုင်းအဝိုင်းမှ တိကျသည့် သတင်းများ ရရှိထားပါတယ်။ ဦးသိန်းစိန်ဟာ မရွယ်ဘဲ စော်ကဲ မင်းဖြစ်ခဲ့တာကြောင့် ပြင်ဆင်မှု မရှိဘဲ သမ္မတ တက်လုပ်ရ သူ ဖြစ်ကြောင်း၊ နှလုံးမှာ စက်တပ်ပြီး လောကကြီးကို အေးအေးဆေးဆေး ဖြတ်သန်းရန် ပြင်ဆင်နေတဲ့အတွက် တန်းဖြုတ်ပြီးသား ဖြစ်ကြောင်း၊ ဦးသန်းရွှေရဲ့ ရုပ်သေးအဖြစ် တင်ထား ခံခဲ့ရပေမယ့် သက်ရှိဖြစ်ပြီး သမ္မတဆိုတဲ့ အာဏာကို အဘိုးကြီးလာထိလို့ မကျေမချမ်းဖြစ်ကာ အဘိုးကြီးရဲ့ ကြိုးဆွဲမှုကနေ ရုန်းထွက်နေတဲ့ အကြောင်း၊ ကျေးဇူးကို ဆပ်ချင်ပါသော်လည်း တလွဲအစီအစဉ်အတိုင်း နိုင်ငံကို မထားရက်တဲ့အတွက် တတ်သလောက် လုပ်နေကြောင်း၊ အစိုးရအဖွဲ့ဝင်များရဲ့ အစည်းအဝေး Cabinet ဟာ မပြတ်သား မပီပြင်ဘဲ သီးခြားတွေ့ဆုံပွဲ ဒုသမ္မတ-၁ / ၈ လုံးခန်းမှာ ထပ်လုပ်ရကြောင်း၊ ဒေါ်အောင်ဆန်းစုကြည်နှင့် တွေ့ဆုံပွဲကို တစ်ဦးတည်း ကြိတ်လုပ်ခဲ့ကြောင်း၊ ပါတီကိုလည်း မပြတ်တပြတ် လုပ်နေကြောင်း၊ အစရှိတာတွေကို ကြားနေရပါတယ်။ Hear Say ဖြစ်လို့ ရာနှုန်းပြည့် မှန်မယ်လို့ ပြောလို့ မရပေမယ့် တစ်ချို့အကြောင်းများကတော့ အမှန်ဖြစ်နေပါတယ်။
အင်မတန်များလှတဲ့ သမ္မတလစာ (ကျပ် ၅၀ သိန်း) လို့ ယူဆတဲ့အတွက် လျှော့ယူတာ ကျေးဇူးတင်စရာ ကောင်းပေမယ့် Clean governance & Good government ဖြစ်ဖို့တော့ အစိုးရအဖွဲ့အနေဖြင့် အူမတောင့်ဖို့ လိုပါတယ်။ (၉၉) ကျပ်သား (ကျပ်မပြည့်သော) တိုင်းဒေသဝန်ကြီးတွေ အနေဖြင့် ကိုယ်ပိုင် စာရေးတောင် မထားနိုင်တဲ့ အခြေအနေပါ။ တိုင်းပြည်အတွက် ဗိုက်ဆာရင် လုပ်လို့ မကောင်းပါ။ ၂၀၀၈ အခြေခံဥပဒေကို နားလည်သူတွေကတော့ လစာလျှော့ယူရင်လည်း Bill တင်ရမယ်၊ ဘက်ဂျက်ဖြတ်ရင်လဲ Bill တင်ရ မယ်၊ ကားအဟောင်းလဲရင်လည်း Bill တင်ရမယ်၊ ပင်စင်လစာတိုးလဲ Bill တင်ရမယ်၊ စီမံကိန်း အသစ် လုပ်ရင်လဲ Bill တင်ရမယ်၊ နောက်ဆုံး စီးပွားကျလို့ အခွန်လျော့တာလဲ Bill တင်ရမယ်တဲ့။ လူအုပ်ချုပ်တဲ့ စနစ်များ မှားခဲ့လို့ မူဖြင့် အုပ်ချုပ်ရသော စနစ်ဖြစ်လာခဲ့တာပါ။ သမ္မတကြီးရယ် ဦးသန်းရွှေလို လုပ်လို့ မရပါ။
သမ္မတကြီးမှာ လယ်တဲရှိတယ် အင်မတန် စနစ်ကျသော စံပြလယ်ယာအဖြစ် ထူထောင်ထားတဲ့ နေပြည်တော်က လယ်တဲမှာ (နေရာအတိအကျ မသိသေးပါ) ခဏခဏ လူများစွာနှင့် အစည်းအဝေးလုပ်ပြီး တိုင်းပြည်ကို ကယ်တင်ရန် ကြံနေပါလား။ တိုင်းပြည်ကို အရင်မကယ်ပါနှင့် ကိုယ့်ကိုယ်ကို အရင်ကယ်ပါဦးခင်ဗျား။ ဦးသန်းရွှေရဲ့လက်နဲ့ ဦးတင်အောင်မြင့်ဦးရဲ့ အမျက်မှ လွတ်အောင်လုပ်ပြီး ကတိပေးခဲ့သည့် မိန့်ခွန်းများအတိုင်း ဆက်လက်ဦးဆောင်ပါ… ခေါင်းဆောင်ကြီး။ သမ္မတကြီးအတွက် ထွက်ပေါက်ရှိပြီး နိုင်ငံကို ကယ်တင်မည့် ကျမ်းကြီးတစ်စောင် ရှိပါတယ်။ ၂၀၀၈ အခြေခံဥပဒေကို သေချာ ဖက်တွယ်ပြီး အလုပ်လုပ်ပါ။ အခြေခံ ဥပဒေပါ အချက်များကို သမ္မတကြီး ပိုင်နိုင်မှာပါ။ ကိုယ်တိုင် တည်းဖြတ်ခဲ့တာပဲလေ။ မသိသလို၊ သိသလိုရှိက ပြည်သူကို မေးပါဗျာ။ ပြည်သူများဟာ နိုင်ငံရဲ့ သား သမီး ရတနာဖြစ်သလို အစိုးရ၏ မိဘလည်း ဖြစ်ပါတယ်။ မိန့်ခွန်းတွေကို စတန့် မထွင်ပါနှင့် ခင်ဗျား။ လူထုဦးစိန်ဝင်း မကြိုက်ပါ ( ပြည်သူက မိဘလား၊ အစိုးရက မိဘလား။ ရေး…. လူထုဦးစိန်ဝင်း)
ကမ္ဘာကျော် ဗမာပြည်ခေတ်သစ်မိန့်ခွန်းကို ကိုယ်တိုင်လိုက်နာပြီး မြန်မာနိုင်ငံကို ကမ္ဘာ့ရွာထဲသို့ ပြန်သွင်းပါ။ လိုအပ်က ဆရာကျော်ဝင်းနှင့် တိုင်ပင်နိုင်ပါသည်။ (ဆရာကျော်ဝင်းထံတွင် 7 Habits ဘာသာပြန်ပြီးသား ရှိပါသည်။) ဖွဲ့စည်းပုံအခြေခံ ဥပဒေကို လိုက်နာပါ။ (ဒေါက်တာနေဝင်းမောင် အလွန်ပိုင်ပါတယ်။ Egress တွင် ၂၀၀၈ ဥပဒေကို အသေအချာ သင်ပါသည်။ နိုင်ငံရေးပါတီငယ်များ- အထူးသဖြင့် ကိုနေမျိုးဝေ သေချာ ဖတ်ထားပါတယ်။) NLD မှတ်ပုံပြန်တင်ပါက (ဦးတင်အေးတွင် ပါတီများ မှတ်ပုံ တင်ရေးနှင့် ရွေးကောက်ပွဲလုပ်ရန် တာဝန်များမှအပ ၎င်းတွင် လတ်တလော ဘာအလုပ်မှ မရှိဘဲ ဘေးထိုင် နေချိန် အန်တီစုမှ လူတွေ့တောင်းဆိုလျှင် ချက်ခြင်း ပါတီထူထောင် နိုင်ပါသည်။) ၂၀၀၈ ဥပဒေ ကို NLD လက်မခံသည့်တိုင် စာအုပ်စိမ်းနှင့် ပေါက်ပြီး အစိုးရကို လမ်းကြောင်းတည့်အောင် လုပ်၍ ရပေမည်။
အန်တီစုခင်ဗျား- ၂၀၀၈ ဥပဒေကို လက်မခံခြင်းထက် ဥပဒေအတိုင်း လွှတ်တော်နှင့် အစိုးရ လုပ် မလုပ်ကို စောင့်ကြည့်စေချင်ပါသည်။ နိုင်ငံတည်ဆောက်ရေးတွင် အန်တီစု အနေဖြင့် မတူတာ တွေ ဘေးဖယ်ပြီး တူတာတွေ ဆက်လုပ်မည်ဟု ပြောဆိုခဲ့သည့်အတွက် ကျေးဇူးတင်ပါသည်။ တူသည်မှာ နိုင်ငံဖွံ့ဖြိုးရေးနှင့် ဒီမိုကရက်တစ်လူ့ဘောင် တည်ဆောက် ရေးအတွက် အန်တီစုမှ တွန်းအားပေးစေချင်ပါသည်။
နိုင်ငံကို ကောင်းအောင်ဖန်တီးပေးမည့် ခေါင်းဆောင်ကတော့ ဒေါ်အောင်ဆန်းစုကြည် နှင့် ဦးရွှေမန်း၊ ဦးသိန်းစိန် တို့ဖြစ်ကြောင်း ကျွန်တော် သတ်မှတ်ထားပါသည်။ ဥပဒေပြုရေး၊ အုပ်ချုပ်ရေးနှင့် ပြည်သူများ၏ ဆက်ဆံရေးသည် ဒီမိုကရေစီ၏ တန်ဖိုးများထဲမှ တစ်ခုဖြစ် ပါတယ်။



ဒီတခါတော့ ဖတ်လို့ရမယ်ထင်ပါတယ်။ ဇော်ဂျီဖောင့်နဲ့ပါပဲ။
ယုံကြည်စွာဖြင့်Rest of your post

0 comments:

 
----------------------------------------- */ /* EOT ----------------------------------------- */