သင့် သတင်းထောက် ကို သင် ထိုးကြွေးသင့်ပါသလား..

သင့် သတင်းထောက်ကို သင်ကိုယ်တိုင် ကာကွယ်ပါ
သန်းစိုးလှိုင်၊ ရန်ကုန် ဇန်န၀ါရီ ၁၅၊ ၂၀၁၀
သတင်းထောက်လား သူပုန်လား
သတင်းထောက် တယောက် ပခုက္ကူမှာ သတင်းယူတာနဲ့ ပတ်သက်ပြီး အဖမ်းခံလိုက်ရတယ်လို့ လွန်ခဲ့တဲ့ ၄လ၀န်းကျင်က ကြားမိပါတယ်။ ဘယ်သူဘယ်ဝါ ဆိုတာ ဘယ်လို သတင်းယူပြီး အဖမ်းခံရသလဲ ဆိုတာတွေ အဲဒီ အချိန်က ဘာမှထပ်မကြားရတော့ပဲ ပျောက်သွားရာက ၃လ ကျော်အကြာ ၂၀၀၉ ခုအကုန်မှာတော့ ထောင်ဒဏ် အနှစ် ၂၀ချမှတ်လိုက်တယ်လို့ ဆိုတာထပ်ကြားသိရပါတယ်။

သတင်းထောက် တယောက်ကို ပြည်ပသတင်းဌါနအတွက် သတင်းယူပေးတာနဲ့ လူသတ်မှု၊ နိုင်ငံတော် ပုန်ကန်မှုတွေလောက် ပြစ်ဒဏ်ကြီးနဲ့ ချရသလားဆိုတာကို ပြည်တွင်းကရော ပြည်ပကပါ ကြားရတဲ့သူတိုင်းက အံ့အားသင့်နေကြပါတယ်။ နအဖ အစိုးရက ပြည်ပသတင်းဌါနတွေနဲ့ ဆက်သွယ်လုပ်ကိုင်တဲ့သူကို နိုင်ငံတော် ပုန်ကန်သူတွေလောက် သဘောထားပြီး ကြီးမားတဲ့ ပြစ်ဒဏ် ချမှတ်နေတာပါ။
မကြာသေးမီက အကျဉ်းထောင်က လွတ်မြောက်လာတဲ့ သတင်းထောက် တဦးက ယခုအဖြစ်အပျက်နဲ့ ပတ်သက်ပြီး
“ဒီသတင်း ကြားရတော့ ရုတ်တရက် အံ့သြသွားတယ်။ ပြည်သူတွေကို ဒုက္ခရောက်အောင်လုပ်တဲ့ အမှုလဲမဟုတ်၊ အရမ်းကို ပြင်းလွန်းတယ်”
လို့သူခံစားရတာကို ထုတ်ဖေါ်ပြောဆိုပါတယ်။
နအဖ အစိုးရဟာ သူတို့ရဲ့ လုပ်ရပ်တွေကို ဖေါ်ထုတ်နေတဲ့ ပြည်ပမီဒီယာ အတွက်လုပ်ပေးနေသူတွေကို ဖေါ်ထုတ်ဖို့ အမြဲတမ်း စောင့်ကြည့် နေတာပါ။ သတင်းယူသူတွေ အနေနဲ့ ရဲတွေ၊ စရဖနဲ့ ကြံ့ဖွတ်တွေ စောင့်ကြည့်နေတဲ့ အန္တရာယ်ကြားမှ မြန်မာနဲ့ နိုင်ငံတကာ လူထုကို တင်ပြလိုဇောနဲ့ လုပ်ကိုင်နေကြတာပါ။

ပြည်သူတို့ရဲ့ စကားပြန်အလုပ်
သတင်းထောက်တွေ အနေနဲ့ ထောင်ကျတန်းကျမယ့် အန္တရာယ် ကြားမှ သွားလာ လုပ်ကိုင်နေကြတာဟာ သတင်းအတွက်ရမယ့် ငွေကြေး တခုထဲကြောင့် မဟုတ်ကြပါဘူး။ သတင်းရေး၊ သတင်းဓါတ်ပုံရိုက်၊ သတင်းဗီဒီယို ရိုက်လို့ရတဲ့ ငွေကြေးဟာ သတင်းထောက် တယောက်အတွက် ထောင်နဲ့လဲရလောက်အောင် တန်တဲ့ငွေကြေးပမာဏ မဟုတ်ပါဘူး။
ပြည်ပ သတင်း ၀က်ဆိုက်တခုအတွက် သတင်းရေးသားပေးနေသူ တဦးက
“ကျွန်တော်တို့ သတင်းထောက် အလုပ်ကို ရွေးချယ်ပြီးနောက်မှာ ဒီအလုပ်ဟာ ဖုံးကွယ်နေတဲ့အဖြစ်အပျက်၊ မတရားခံစားနေရတာတွေ အစိုးရရဲ့ မတရား အနိုင်ကျင့်တာတွေကို ဖေါ်ထုတ်တင်ပြပေးပြီး အဲဒီလိုတင်ပြပေးတဲ့ အတွက် ခံစားရတဲ့ သူတွေမှာ သက်သာသွားတာ အခြေအနေပြောင်းလဲသွားတာတွေ ရှိလို့ ကျေနပ်တဲ့ ခံစားမှုမျိုးခံစားရပါတယ်။ လုပ်အားခ ရရုံတခုထဲနဲ့တော့ အခုလို အန္တရာယ်များတဲ့ အလုပ်ကိုလုပ်ဖို့ ရည်ရွယ်ချက် မရှိပါဘူး”
လို့ဆိုပါတယ်။
အခုကိစ္စအတွက် နိုင်ငံတကာ အဖွဲ့အစည်းတွေက ယခုထက်ပိုပြီး နအဖ အစိုးရကို ဝေဘန်ပြီး ဖိအားပေးဖို့ သတင်းထောက် တယောက်အနေနဲ့ လိုလားတာ အမှန်ပါပဲ။ ယခုအခြေအနေ ဖြစ်ပျက်ထိရောက်ရှိပြီးမှ လုပ်နိုင်တဲ့ အချက်အလက်တွေကို စဉ်းစားကြည့်တဲ့အခါ အဆိုပါ အချက်ကို တွေ့မြင်မိတာပါ။

မဖြစ်ခင် ကြိုတင်ကာကွယ်ကြဖို့
အခြားတဖက်မှာတော့ သတင်းထောက်တယောက်အနေနဲ့ ယခုလို အခြေအနေမျိုး မကြုံတွေ့ဖို့ ဘယ်လို အချက်အလက်တွေကို သတိပြုသင့်သလဲ ဘာတွေ သတိထားရမလဲ ဆိုတာတွေကို လည်းပြောဆို ဆွေးနွေးစရာ ရှိလာပါတယ်။
ယခု အဖမ်းခံရတဲ့မလှလှဝင်းကို မီဒီယာ အသိုင်းအ၀ိုင်းမှ ဘယ်သူမှ သိပ်မသိရှိကြပါဘူး။ ပြင်ပမီဒီယာ အတွက်လုပ်ကိုင်ပေးသူ ဖြစ်လို့ လူသူသိပ်မသိတဲ့ အချက်ဟာ လုံခြုံရေးအတွက် ကောင်းပေမယ့် သူလုပ်ဆောင်တဲ့ အလုပ်နဲ့ ပတ်သက်တဲ့ ဘေး အန္တရာယ်တွေကိုတော့ ကြိုတင်တွက်ဆ နားလည်ထားသင့်ပါတယ်။
သတင်းထောက်လုပ်ကိုင် ဖူးသူတွေဆိုရင်တော့ သတင်းယူတဲ့ အတွေ့အကြုံရှိပြီး အန္တရာယ် ရှိတဲ့ ပတ်ဝန်းကျင်၊ အန္တရာယ် အငွေ့အသက်တို့ကို ခန့်မှန်းတွက်ဆနိုင်မှာပါ။ ရှုပ်ထွေးတဲ့ အခြေအနေမျိုးဖြစ်တဲ့ သဘာဝကပ်ဘေး၊ အဓိကရုဏ်း နဲ့ စစ်ပွဲ သတင်းတို့လိုမှာတော့ သတင်းထောက်တွေရဲ့ လုံခြုံရေးဟာ ပိုမိုအန္တရာယ် ရှိပြီးကြိုတင် တွက်ဆရလည်း ခက်ခဲပါတယ်။ အဲလိုမဟုတ်ပဲ ယခု ပခုက္ကူ အဖြစ်အပျက်လို မျိုးမှာတော့ မသွားခင် မယူခင်မှာ အခြေအနေကိုလေ့လာ အကဲခတ်သင့်တဲ့ အနေအထားလို့ ဆိုရမှာပါ။

သတင်းသမား ဘာလဲ ဘယ်လဲ
ပြည်တွင်း မီဒီယာသမားတွေနဲ့ အထိအတွေ့များပြီး ယခင်က သူကိုယ်တိုင် မီဒီယာသမား တဦးဖြစ်ခဲ့သူ တဦးက
“အခုကိစ္စမှာ တကယ်လို့ သတင်းကျင့်ဝတ်နဲ့ အညီသတင်းယူတာ ဆိုရင် သတင်းထောက် တယောက်ဟာ ဥပဒေရဲ့ စောင့်ရှောက်မှုကို ရသင့်တယ်။ နောက်တော့ ဒီသတင်းထောက်ကို အယ်ဒီတာက ခိုင်းတယ်ဆိုရင် အယ်ဒီတာရဲ့ ပံ့ပိုးမှုကို ရသင့်တယ်၊ သတင်းဌါနနဲ့ အယ်ဒီတာက ဒီသတင်းကို လိုက်ခိုင်းတာဆို ဌါနမှာ တာဝန်လုံးလုံးရှိတယ်”
လို့သူ့အမြင်ကို ပြောဆိုပါတယ်။
နအဖ အစိုးရဟာ သတင်းသမားတွေကို အတိုက်အခံနိုင်ငံရေး သမားတွေလောက် သြဲံကီးမဲကြီး စောင့်ကြည့်ပြီးနောက်က လိုက်နေတာမျိုး မဟုတ်ပေမယ့်လည်း သတင်းထောက် တယောက် အနေနဲ့ တကွက်မှားသွားခဲ့ရင် သူ့ကို စတုတ္ထမဏ္ဍိုင်က ဆိုပြီး စစ်အစိုးရက ညှာတာလျော့ပေါ့ပေးတဲ့ သာဓကတွေ မရှိပါဘူး။
ပြည်တွင်းအတွက် လုပ်ကိုင်တာဆိုရင် နှစ်နည်းနည်းပဲ ထောင်ချပြီး ပြည်ပတွက် လုပ်ကိုင်တာဆိုရင်တော့ နှစ်ဆယ်ဂဏန်းနဲ့ ချီပြီးချနေတာ အခုအဖြစ်အပျက်က သက်သေပြနေပါတယ်။

သတင်းတန်ဖိုး၊ သတင်းထောက်တန်ဖိုး
ပြည်တွင်းသတင်းထောက် တယောက်အနေနဲ့ ပြည်ပမှာ အခြေစိုက်ကြတဲ့ သတင်းဌါနတွေကို အသိပေး မေတ္တာ ရပ်ခံချင်တာတခု ရှိပါတယ်။ နိုင်ငံတကာ သတင်းဌါနတွေက ပြည်တွင်းမှာ သတင်းလာယူကြတဲ့ နိုင်ငံခြားသား သတင်းထောက်တွေကို ကူညီဆက်သွယ်ပေး စီစဉ်ပေးတဲ့အခါမှာ သူတို့အမြဲပြောတဲ့ စကားရှိပါတယ်။
အဲဒီစကားက ဘာလဲဆိုရင် - သတင်းထောက် တယောက်ရဲ့ လုံခြုံရေးထက် အရေးကြီးတာ ဘာမှမရှိဘူး၊ အဲဒီနေရာသွားလို့ ကူညီဆက်သွယ်ပေးတဲ့သူ သို့မဟုတ် ဖြေကြားတဲ့သူ တစုံတရာ အန္တရာယ် ကျရောက်နိုင်တယ်ဆို မလုပ်ပါနဲ့ ဆိုတဲ့ သဘောပါ။ အန္တရာယ်နဲ့လဲပြီး သတင်းရယူ ရလောက်အောင် ဆိုရင်အဲဒီသတင်းဟာ တန်ဖိုးမကြီးဘူး လို့လဲပြောပါတယ်။
ဒါဟာ နိုင်ငံတကာ သတင်း အေဂျင်စီတွေနဲ့ သတင်းစာတွေက ထားရှိတဲ့ စံနှုန်းမူဝါဒ ဖြစ်မှာပါ။ ကျွန်တော်တို့ ပြည်ပအခြေစိုက် မြန်မာသတင်းဌါနများ အနေနဲ့လဲ မိမိတို့ရဲ့ ပြည်တွင်း သတင်းထောက်များနဲ့ ပတ်သက်ပြီး သတင်းဌါနရဲ့ စံနှုန်းနဲ့ မူဝါဒထားရှိသင့်ပါတယ်။
သတင်းယူတဲ့သူတွေဟာ အသေခံ ဗုံးခွဲသူ (suicide bomber) တွေမဟုတ်ကြပါဘူး။ သတင်းတကြိမ်ယူပြီး နှစ်ကာလကြာရှည်စွာ အကျဉ်းထောင်ထဲမှာ အချိန်ကုန်ဆုံးစေရမယ့် အခြေအနေဟာ မလိုလားအပ်တဲ့ အခြေအနေတခုလို့ ပြည်တွင်းက သတင်းထောက် တယောက်အနေနဲ့ ယူဆပါတယ်။
နအဖ စစ်အစိုးရက ရက်စက်တယ် ဆိုးတယ်ဆိုတာ တကမ္ဘာလုံးက သိကြပါတယ်။ မကောင်းတဲ့ဘက်မှာ ကမ္ဘာကျော်ပါတယ်။ ဒါပေမယ့် နအဖဆိုးတာကြောင့် သတင်းထောက်တွေ မကြာခဏ အဖမ်းခံနေရ ထောင်ဒဏ်ကျခံနေရတဲ့ ကိစ္စမှာ အားလုံးကို နအဖတာဝန် ချည်းပုံပြီးထားလို့ မဖြစ်သေးပါဘူး။
undercover သတင်းထောက် တယောက်ဟာ အာဏာပိုင်တွေ မသိအောင် သတင်းယူတယ်ဆိုတဲ့ အဖြစ်မှာ သတင်းရဖို့ဟာ သွားတဲ့ဦးတည်ချက် တခုဖြစ်သလို အဖမ်းမခံရအောင် ဆိုတဲ့ အချက်ဟာလည်း ဒုတိယ အရေးကြီးတဲ့ ဦးတည်ချက်ပါပဲ။ အဖမ်းခံရခြင်းဟာ မိခင်သတင်းဌါနအတွက် ဂုဏ်ရှိတဲ့ အချက် မဟုတ်ပါဘူး။ မိမိရဲ့ လုပ်ဖေါ်ကိုင်ဖက်တယောက် မီဒီယာသမားတယောက် အင်အားလျော့သွားသလို အဲဒီတဦးချင်းရဲ့ ဘ၀တွေမှာ ကြီးမားတဲ့ အကျိုးသက်ရောက်မှုတွေ ရှိလာတော့မှာ သေချာပါတယ်။

သတင်းထောက်နဲ့ အတိုက်အခံ ဘ၀တူ
ပြည်ပသတင်းဌါနအတွက် လုပ်ကိုင်ပေးနေတဲ့ သတင်းထောက် တယောက်ရဲ့ ဘ၀ဟာ သတင်းထောက်နဲ့ တက်ကြွလှုပ်ရှားသူ (activist) ဆိုတဲ့ အကြားမှာ ပါးလွှာတဲ့ စည်းတခုလေးပဲ ခြားပါတယ်။ အချို့သော သတင်းထောက်တွေက သတင်းနဲ့ပတ်သက်ပြီး ကျွမ်းကျင်ကြသလို၊ အချို့က သတင်းနဲ့ ပတ်သက်ပြီးမကျွမ်းကျင်ပဲ စစ်အစိုးရကို သတင်းလက်နက်နဲ့ တိုက်မယ်ဆိုတဲ့ ခံယူချက်မျိုးနဲ့ လုပ်ကိုင်သူတွေလည်း တွေ့မြင်နေရပါတယ်။ သတင်းဘက်ကပဲ လာသည်ဖြစ်စေ၊ တက်ကြွလှုပ်ရှားသူ ဘက်ကပဲ လာသည်ဖြစ်စေ တယောက်အဖမ်းခံရတာဟာ တယောက် ကျဆုံးတယ်လို့ပဲ တွက်ရမှာပါ။ သတင်းမီဒီယာ ရှုထောင့်ကကြည့်တဲ့အခါ သတင်းထောက်ကို မစွန့်စားခိုင်းသင့်သလိုပဲ နိုင်ငံရေး ရှုထောင့်ကကြည့်ရင်လည်း ကိုယ့်လုပ်ဖေါ်ကိုင်ဖက် ကျဆုံးတာဟာ တယောက် အင်အားယုတ်လျော့သွားတဲ့ သဘောပါပဲ၊

နောက်ဆုံး မေးခွန်း
နောက်ဆုံး အနေနဲ့ ပြည်ပ သတင်းဌါနများကို မေးခွန်းတခုပဲ မေးချင်ပါတယ်။ ကိုယ့်သတင်းဌါနက သတင်းထောက် တယောက် သတင်းသွားယူရင်း အဖမ်းခံရ အပြစ်ပေးခံရတဲ့ အဖြစ်ဟာ ဂုဏ်ယူစရာ ကိစ္စလား ရှက်စရာ ကိစ္စလားဆိုတာပါ။
http://moemaka.com/index.php?option=com_content&task=view&id=5696&Itemid=1