“၂၀၁၀ ကမ္ဘာ့ လူအခွင့်အရေး၏ တိုက်ပွဲနှစ်” မြန်မာ့သွေးအနီရောင် မညစ်စေနဲ့ ။ စစ်ကျွန်ဘ၀လွှတ်မြောက်ကြဖို့  တော်လှန်ှရေးသို့့ အသင့်ပြင်

Wednesday, September 03, 2008

သူတို့ ဘဲစားနေကြတာ..ပြည်သူက..ဘာမှမရ

မြန်မာ ဒီမိုကရေစီနှင့် လူအခွင့်အရေးအတွက် လှုပ်ရှားနေသော Free Burma Campaign (Korea)၏ ၈၄ ကြီမ်မြောက် သံရုံးရှေ့ သတင်းစာ ရှင်းလင်းပွဲ

http://www.nldla.or.kr/bbs/zboard.php?id=title04&page=1&page_num=20&select_arrange=headnum&desc=&sn=off&ss=on&sc=on&keyword=&no=928&category=1

သဘာဝဓါတ်ငွေ့ စစ်အစိုးရကို မျက်နှာသာပေး၊ အမျိုးသား အကျိုးစီးပွါးအတွက် အကျိုးမရှိ
မိုးသူ နှင့် ထက်ဝင်း

အင်္ဂါနေ့၊ စက်တင်ဘာလ 02 2008 19:16 - မြန်မာစံတော်ချိန်

သဘာဝ ဓါတ်ငွေ့သိုက်များကို ရောင်းချခြင်းဖြင့် မြန်မာ့စီးပွါးရေးမှာ ရှေ့သို့ တဟုန်ထိုး ထိုးတက်သွားခဲ့သော်လည်း အခြား စီးပွါးရေးကဏ္ဍ အများအပြားတွင် သဘာဝဓါတ်ငွေ့ သုံးစွဲမှု လိုအပ်ချက်နှင့် အလားအလာများ ရှိနေသော်လည်း ဤဓါတ်ငွေ့နှင့် ဆက်နွယ်သည့် စက်မှုလုပ်ငန်းများကို တည်ထောင်ရန် စစ်အစိုးရ အနေဖြင့် ပျက်ကွက်ခဲ့ပါသည်။

၂ဝဝ၇ - ၂ဝဝ၈ ဘဏ္ဍာရေးနှစ်တွင် ပြည်ပပို့ကုန်မှ ဝင်ငွေ အမေရိကန်ဒေါ်လာ ၂.၅၆ ဘီလီလျံ ရရှိခဲ့ရာ ၄ဝ % ကို ဓါတ်ငွေ့ တင်ပို့ ရောင်းချရခြင်းမှ ရရှိခဲ့ခြင်း ဖြစ်သည်။

အဓိက ဓါတ်ငွေ့သိုက်များကို ၂ဝဝ၄ ခုနှစ်တွင် ရခိုင်ကမ်းလွန် ပင်လယ်ပြင်၌ တောင်ကိုးရီးယားနိုင်ငံ ဒေဝူး ကုမ္ပဏီမှ ရှာဖွေ တွေ့ရှိခဲ့ပြီး၊ မုတ္တမ ပင်လယ်ကွေ့မှ ဓါတ်ငွေ့သိုက်ကို ထိုင်းနိုင်ငံ (PTTEP) ကုမ္ပဏီက မကြာသေးမီက တွေ့ရှိခဲ့ခြင်းကြောင့် မြန်မာ့စွမ်းအင်ကဏ္ဍအပေါ် နိုင်ငံတကာ၏ အာရုံစိုက်မှုကို ရရှိခဲ့သည်။

မြန်မာ့ရေနံမြေနှင့် သဘာဝဓါတ်ငွေ့ လုပ်ငန်းများ ဖွံ့ဖြိုးရေး လုပ်ငန်းသည် မြန်မာ့စီးပွါးရေး၏ အခြားကဏ္ဍများထက် နိုင်ငံခြား ရင်းနှီးမြှုပ်နှံမှုကို ပိုမို ဆွဲဆောင်နိုင်ခဲ့သည်။ သို့သော် အချို့သော စီးပွါးရေး ပညာရှင်များကမူ ဓါတ်ငွေ့အတွက်သာ အလုအယက် မြှုပ်နှံနေခြင်းကြောင့် အခြားစီးပွါးရေး ကဏ္ဍများသည် ဒေသတွင်း ယှဉ်ပြိုင်ဘက် နိုင်ငံများနှင့် ယှဉ်လျှင် နောက်ကျ ကျန်နေခဲ့သည်ဟု သူတို့၏ စိုးရိမ်ပူပန်မှုကို ထုတ်ဖေါ် ပြောကြားကြပါသည်။

သဘာဝဓါတ်ငွေ့များ ရောင်းချခြင်းကြောင့် ကုန်သွယ်ရေး ပိုငွေများ ပိုမို ရရှိလာခဲ့သဖြင့် မြန်မာနိုင်ငံအတွက် တန်ဖိုးရှိလှသော အခုအခံများ ရရှိစေခဲ့သည်မှာ မှန်သော်လည်း ဤသို့ အမျိုးသား စီးပွါးရေးကို ပို့ကုန် ဈေးကွက်ပေါ်တွင်သာ မှီခို အားထားနေခြင်းသည် ကမ္ဘာ့ဓါတ်ငွေ့ ဈေးနှုံးများ ကျဆင်းလာသည့်အခါ တိုင်းပြည်၏ စီးပွါးရေးကို အန္တရာယ်နှင့် ကြုံတွေ့စေနိုင်သည်ဟု အာရှဖွံ့ဖြိုးရေး ဘဏ်က မတ်လ ၂၇ ရက်နေ့က ထုတ်ပြန်ခဲ့သော အစီရင်ခံစာတွင် သတိပေး ဖေါ်ပြ ထားပါသည်။

မည်သို့ပင်ဆိုစေ၊ မြန်မာ့ ဓါတ်ငွေ့များကို နိုင်ငံခြားသို့ တင်ပို့ ရောင်းချသည်ထက် ပြည်တွင်း စက်မှုလုပ်ငန်းများတွင် အဓိက အသုံးပြုလျှင် အလုပ်အကိုင် အခွင့်အလမ်းများ ဖန်တီးပေးခြင်း အပါအဝင် ရေရှည် စီးပွါးရေး ဖွံ့ဖြိုး တိုးတက်သည့် အကောင်းဆုံး နည်းလမ်း ဖြစ်စေလိမ့်မည်ဟု ကျွမ်းကျင်သူများက ပြောကြားကြပါသည်။

မြန်မာ့ဓါတ်ငွေ့သိုက်များကြောင့် အကျိုး ဖြစ်ထွန်းစေနိုင်မည့် စီးပွါးရေး ကဏ္ဍများတွင် စိုက်ပျုိးရေးနှင့် စက်မှုလုပ်ငန်း ကဏ္ဍတို့ ပါဝင်သည်။ ဥပမာအားဖြင့် ဓါတ်ငွေ့ကို ဓါတ်မြေသြဇာ သို့မဟုတ် ဘိလပ်မြေ ထုတ်လုပ်ရေး လုပ်ငန်းများတွင် အသုံးပြုနိုင်သည်။

"ကျနော်တို့ ဓါတ်မြေသြဇာ စက်ရုံတွေသာ ဆောက်မယ်ဆိုရင် ပြည်တွင်းသုံးအတွက် ထုတ်လုပ်နိုင်မှာ ဖြစ်ပြီးတော့ ပိုလျှံတဲ့ မြေသြဇာတွေကိုလည်း ပြည်ပကို တင်ပို့ ရောင်းချနိုင်မှာ ဖြစ်ပါတယ်" ဟု ရန်ကုန်အခြေစိုက် ပညာရှင်တဦးက ပြောကြားသွားခဲ့ပါသည်။ ဤသို့ လုပ်ဆောင်ခြင်းသည် ချမှတ်ထားသော သွင်းကုန် အစားထိုးရေး မူဝါဒနှင့်လည်း ကိုက်ညီပြီး ဤပေါ်လစီကို စစ်အစိုးရက သူတို့၏ မတည်ငြိမ်သော စီးပွါးရေး မူဝါဒများတွင် မကုန်မခမ်းနိုင် အသုံးပြုခဲ့သည်။

မြန်မာနိုင်ငံအတွင်း နှစ်စဉ် သုံးစွဲနေသော ဓါတ်မြေသြဇာပမာဏမှာ တန်ချိန် ၁.၆ သန်းရှိပြီး၊ ပြည်တွင်းတွင် ထုတ်လုပ်နိုင်သော ပမာဏမှာ တန်ချိန် ၂ သိန်းသာရှိ၍ မြန်မာလယ်သမားများ၏ သုံးပုံတပုံသာ ဓါတ်မြေသြဇာ အသုံးပြု စိုက်ပျိုးနေရသည် ဟု ပြည်ထောင်စု မြန်မာနိုင်ငံ ကုန်သည်ကြီးများနှင့် စက်မှုလုပ်ငန်းရှင်များ အဖွဲ့က မကြာသေးမီက ထုတ်ပြန်ခဲ့သော ကိန်းဂဏန်းများတွင် ဖေါ်ပြထားပါသည်။

ကုန်ထုတ်လုပ်ငန်းများ အပါအဝင် စက်မှုလုပ်ငန်း အများအပြားအတွက် လိုအပ်နေသော လျှပ်စစ်ဓါတ်အား ထုတ်လုပ်ရန် ဓါတ်ငွေ့ လိုအပ်ချက် အမြောက်အမြား ရှိနေသည်ကို စစ်အစိုးရက ကောင်းစွာ သိနားလည်ထားသော်လည်း ဓါတ်ငွေ့ကို အသုံးပြုရန် ပျက်ကွက်နေဆဲ ဖြစ်သည်။

မြန်မာနိုင်ငံ စီးပွါးရေး၏ အသက်သွေးကြောဖြစ်သော စိုက်ပျိုးရေး လုပ်ငန်းနှင့် နှိုင်းစာလျှင်ပင် အလုပ်အကိုင် ဖန်တီးပေးနိုင်မှု အခွင့်အလမ်း၌ စွမ်းအင်မပြတ်တမ်း လိုအပ်နေသော ကုန်ထုတ် စက်မှုလုပ်ငန်းများက သာသည်။ ကျေးလက်မှ မြန်မာလူငယ် အများအပြားသည် အလုပ်အကိုင် ရှာဖွေရန်အတွက် မြို့ကြီးပြကြီးများသို့ ပိုမို ထွက်ခွါသွားနေကြသည်။

တသမတ်တည်းရှိ၍ လုံလောက်သော လျှပ်စစ်စွမ်းအင် ရရှိနိုင်မှု ချို့တဲ့နေခြင်းသည် မြန်မာ့စီးပွါးရေး၏ အဓိက ချို့ယွင်းချက်ကြီး တရပ် ဖြစ်နေသည်။ သဘာဝ ဓါတ်ငွေ့များကို အသုံးပြု လည်ပတ်ရန်၊ သဘာဝဓါတ်ငွေ့ ရောင်းရငွေများနှင့် လျှပ်စစ်ဓါတ်အားပေး စက်ရုံများ တည်ဆောက်ရေးသည် ကုန်ထုတ်စက်မှု လုပ်ငန်းများ၏ လျှပ်စစ်စွမ်းအင် လိုအပ်ချက်ကို ဖြေရှင်းပေးနိုင်ရေးအတွက် ချက်ချင်းနှင့် ပထမခြေလှမ်းအဖြစ် လုပ်ဆောင်ရမည့် လုပ်ငန်း ဖြစ်နိုင်ပါသည်။

မြန်မာ့လျှပ်စစ်ဓါတ်အား ထုတ်လုပ်မှုတွင် သဘာဝ ဓါတ်ငွေ့သုံး စက်ရုံများမှ ထုတ်လုပ်မှုသည် ၄ဝ% ရှိပြီး၊ ရေအားလျှပ်စစ်သည် ၅ဝ% ရှိကာ ရေနွေးငွေ့ တာဘိုင်စက်ရုံများမှ ထုတ်လုပ်မှုသည် ၉ % ရှိ၍ ဒီဇယ်အင်ဂျင်များဖြင့် ထုတ်လုပ်မှုသည် ၁% သာ ရှိသည်ဟု မြန်မာ့လျှပ်စစ် စွမ်းအားဝန်ကြီးဌာန အမှတ် ၁ မှ ထုတ်ပြန်သော ကိန်းဂဏန်းများတွင် ဖေါ်ပြထားပါသည်။

မြန်မာနိုင်ငံတွင် သဘာဝ ဓါတ်ငွေ့သိုက် အများအပြားရှိ၍ ဤဓါတ်ငွေ့များကို ရောင်းချခြင်ဖြင့် ဝင်ငွေရ အကျိုးဖြစ်ထွန်းလျက် ရှိသော်လည်း တိုင်းပြည်၏ သယံဇာတ အရင်းအမြစ်များကို အကောင်းဆုံး အသုံးချခြင်းသည်သာ တိုင်းပြည်၏ ရေရှည် ဖွံ့ဖြိုးတိုးတက်ရေးအတွက် အရေးပါသည်ဟု မကြာသေးခင်က ထုတ်ပြန်ခဲ့သည့် အာရှဖွံ့ဖြိုးရေးဘဏ် (ADB) ၏ မြန်မာ့စီးပွါးရေး အစီရင်ခံစာတွင် ဖေါ်ပြထားပါသည်။

အဆိုပါ အစီရင်ခံစာက ဓါတ်ငွေ့ တင်ပို့ရောင်းချခြင်းကို ကောင်းစွာ အသုံးချနိုင်ခဲ့လျှင် ငွေလဲနှုံး တညီတညာတည်း ဖြစ်အောင်လုပ်ခြင်း၊ ဘဏ္ဍာရေးစနစ် ခိုင်မာအောင် လုပ်ခြင်း နှင့် စိုက်ပျိုးရေးလုပ်ငန်း၌ ဖွင့်ပေးခြင်းတို့ အပါအဝင် အဆောက်အအုံ ပြုပြင်ပြောင်းလဲရေး လုပ်ငန်းများကို တက်လှမ်းနိုင်ရန် အခါအခွင့်ကောင်းများ ရရှိနိုင်သည်ဟု ဆိုလိုက်ပါသည်။ ဤပြုပြင်ပြောင်းလဲရေး လုပ်ငန်းများတွင် အစိုးရ အသုံးစရိတ်ကို လူမှုရေးနှင့် မျက်မြင်လက်တွေ့ အခြေခံ အဆောက်အအုံများ ဖွံ့ဖြိုးတိုးတက်ရေး လုပ်ငန်း၌ ပြောင်းလဲ အသုံးပြုစေခြင်းလည်း ပါဝင်သည်။

"စိုက်ပျိုးရေး လုပ်ငန်း၏ အရေးပါမှုနှင့် ဆင်းရဲမွဲတေမှုအပေါ် အကျိုး သက်ရောက်မှုတို့ကို ကြည့်၍ ဤကဏ္ဍကို ခိုင်မာ အောင် လုပ်ခြင်းသည် အဓိက ရည်မှန်းချက်တရပ် ဖြစ်သင့်သည်" ဟု အဆိုပါ အစီရင်ခံစာတွင် ဖေါ်ပြထား ပါသည်။

သဘာဝဓါတ်ငွေ့မှ နောက်ထပ် ရရှိနိုင်သော အကျိုးကျေးဇူး တရပ်မှာ သဘာဝဓါတ်ငွေ့ ရောင်းရငွေ ရံပုံငွေတရပ် ထူထောင်ထားရှိပြီး ကုန်ဈေးနှုံးများ တည်ငြိမ်ရေးနှင့် တိုင်းပြည်စီးပွါး ဖွံ့ဖြိုးတိုးတက်ရေး လုပ်ငန်းကို အထောက်အကူ ဖြစ်စေနိုင်ခြင်း ဖြစ်သည်။

"သဘာဝ ဓါတ်ငွေ့ကဲ့သို့သော သယံဇာတမှာ ကုန်ခမ်းသွားနိုင်သော အရင်းအမြစ်တခု ဖြစ်သည်။ ဒါကြောင့် သဘာဝ ဓါတ်ငွေ့ ရောင်းရငွေနဲ့ ရံပုံငွေတရပ် ထူထောင်ထားရှိနိုင်မယ်ဆိုရင် တိုင်းပြည်စီးပွါးရေးနဲ့ ဓါတ်အား ထုတ်လုပ်ရေးအတွက် ကောင်းမှာဘဲ" ဟု ရန်ကုန်အခြေစိုက် စီးပွါးရေး ပညာရှင်တဦးက ပြောသွားပါသည်။

မြန်မာနိုင်ငံ၏ ကုန်သွယ်မှု ပမာဏမှာ သဘာဝဓါတ်ငွေ့ တင်ပို့ ရောင်းချခြင်းကြောင့် တိုးတက်လာနေသော်လည်း တိုင်းပြည် စီးပွါးရေးမှာ စိုက်ပျိုးရေးကို အခြေခံသော စီးပွါးရေးသာ ဖြစ်မြဲဖြစ်နေခြင်းကြောင့် မြန်မာနိုင်ငံ ရေရှည်စီးပွါးရေး ဖွံ့ဖြိုးရေး တိုးတက်မှု၏ ဓါတ်ကူပစ္စည်းတရပ်အဖြစ် သဘာဝဓါတ်ငွေ့ကို မယူဆနိုင်သေးပါ။ ထို့ပြင် မြန်မာနိုင်ငံ၏ ဓါတ်ငွေ့သိုက်များမှာလည်း အရှေ့အလယ်ပိုင်းနှင့် ရုရှနိုင်ငံတို့ကဲ့သို့ အားကိုးအားထား ပြုလောက်အောင် ကြီးမားခြင်းမရှိ ဟုလည်း ကျွမ်းကျင်သူများက ပြောကြပါသည်။

ဤသို့သော ရံပုံငွေတရပ်သည်သာ တိုင်းပြည်၏ ရေရှည်စိတ်ချရသော စီးပွါးရေး ဖွံ့ဖြိုးတိုးတက်မှုကို ရရှိစေနိုင်မှာ ဖြစ်ပြီး၊ ဤရံပုံငွေကို သေချာပေါက် အမြတ်အစွန်း ရနိုင်သော စီးပွါးရေး လုပ်ငန်းများ၊ စက်မှုလုပ်ငန်းများတွင် ရင်းနှီးမြှုပ်နှံထားခြင်းဖြင့် ဝင်ငွေရရှိစေနိုင်မည် ဖြစ်သလို ငွေကြေးဖေါင်းပွမှုကြောင့် ရံပုံငွေတန်ဘိုး ကျဆင်းခြင်းမှလည်း ကာကွယ်သွားနိုင်မည် ဖြစ်သည်။

သဘာဝဓါတ်ငွေ့ ဝင်ငွေရံပုံငွေတရပ် ထူထောင်ထားခြင်းဖြင့် ကုန်ဈေးနှုံးများကို တည်ငြိမ်အောင် လုပ်ထားနိုင်မှာဖြစ်ပြီး ငွေကြေးဖေါင်းပွမှုကိုလည်း ကန့်သတ်ထားနိုင်မှာ ဖြစ်သည်။ မြန်မာနိုင်ငံသည် လွန်ခဲ့သော ၅ နှစ်အတွင်း မိုးထိအောင် ထိုးတက်သည့် ကုန်ဈေးနှုံး မြင့်မားခြင်းများနှင့် ကြုံတွေ့ခဲ့ရပြီး ကြောက်ခမန်းလိလိ ငွေကြေးဖေါင်းပွမှုကိုလည်း တွေ့မြင်ခဲ့ရပြီး ဖြစ်သည်။

ရေနံနှင့် သဘာဝဓါတ်ငွေ့ ရောင်းရငွေများမှ ရံပုံငွေတရပ် ထူထောင်ထားရှိခြင်းကို နော်ဝေ၊ ကူဝိတ်၊ ကာဇတ်စတန် နှင့် အဇာဘိုင်ဂျန်နိုင်ငံတို့တွင် ထင်သာမြင်သာရှိမှု ပိုမိုရရှိရန်နှင့် ပိုမိုကောင်းမွန်သော အစိုးရတရပ် ရရှိရေးတို့ အတွက် ကျင့်သုံးကြပြီး ဤရည်ရွယ်ချက်များသည် မြန်မာစစ်အစိုးရ အလိုမရှိသော အရာများ ဖြစ်သည်။

မည်သို့ပင်ဖြစ်စေ၊ ဓါတ်ငွေ့ ရံပုံငွေတရပ်ကို ထူထောင်ထားရှိရန်မှာ မြန်မာနိုင်ငံ၏ သဘာဝဓါတ်ငွေ့ ရောင်းချရမှုမှ ရရှိသည့် ဝင်ငွေသည် ရေနံကြွယ်ဝသော နိုင်ငံများက ရရှိနေသည့် ရေနံရောင်းချသည့် ဝင်ငွေကို မမှီသည့်အတွက် မဖြစ်နိုင်ကြောင်း စီးပွါးရေးပညာရှင် အချို့က ယူဆနေကြပါသည်။ သူတို့က မြန်မာနိုင်ငံတွင် ရေနံရောင်းချရမှုမှ ရသည့် ဝင်ငွေ မရှိတော့ခြင်းဆိုသည့် အခိုင်အမာ ဥပမာတရပ်ကို ထောက်ပြ ပြောဆိုကြပါသည်။

တိုင်းပြည်အပေါ် စီးပွါးရေး ပိတ်ဆို့မှုများ ဘယ်လိုပင်ရှိနေနေ "ရင်းနှီးမြှုပ်နှံမှု တိုးတက်လာခြင်းအတွက် အရေးပါလှသော စီးပွါးရေး ဝန်းကျင်ကောင်း တရပ်" ကို မဖန်တီးပေးနိုင်ခြင်း ဆက်လက် ဖြစ်ပေါ်နေခြင်းသည် အစိုးရသာ ပထမဆုံး တာဝန်ရှိသူ ဖြစ်သည်ဟု တုံးတိတိပင် ပြောဆိုထားပါသည်။

ဤသို့သော စီးပွါးရေး ဝန်းကျင်ကောင်းများ ပေါ်ထွက်လာရေးအတွက် ပြုပြင်ပြောင်းလဲရေး လုပ်ငန်းစဉ်များ လမ်းခင်းပေးနိုင်ရေးအတွက် အရေးပါလှသော စီးပွါးရေး ပညာနှင့် စီးပွါးရေးလုပ်ငန်း ကျွမ်းကျင်သူများ၏ အခန်းကဏ္ဍကို စစ်အစိုးရ က ပစ်ပယ်ထားပုံ ရပါသည်။

ဝမ်းနည်းစရာ အကောင်းဆုံး ကိစ္စမှာ သူတို့ ထိန်းချုပ် ကိုင်တွယ်နိုင်သော အတိုင်းအတာ ပမာဏတွင်သာ ရှိသည့် သောက်ဖော်စားဖက်များနှင့် ပူးတွဲ လုပ်ကိုင်သည့် စီးပွါးရေးမျိုးကိုသာ လိုလားနေပြီး ယင်းကြောင့်ပင် တိုင်းပြည်စီးပွါးရေးမှာ နောက်သို့ ပြန်ဆုတ်သွားနေရခြင်း ဖြစ်သည်။

စီးပွါးရေး ပြုပြင်ပြောင်းလဲမှု လုပ်ငန်းများကို လုပ်ဆောင်ခြင်း မရှိဘဲ ပြည်သူလူထု၏ အကျိုးစီးပွါးကို လျစ်လျူရှုကာ သောက်ဖော်စားဖက်စီးပွါးရေး မူဝါဒကိုသာ စီးပွါးရေး ကိစ္စရပ်များတွင် ဗိုလ်ချုပ်ကြီးများက ဆက်လက် ကျင့်သုံး ဆောင်ရွက်နေဆဲ ဖြစ်သည်။

ထို့ကြောင့် မူဝါဒ ချမှတ်သူများက အကောင်းဆုံး အသုံးချနိုင်ရေး အစီအစဉ်များကို ချမှတ် ကျင့်သုံးနိုင်ခြင်း မရှိသ၍ မြန်မာ့ဓါတ်ငွေ့သည် စစ်အစိုးရ၏ အာဏာကိုသာ ပိုမိုခိုင်မြဲစေမှာသာ ဖြစ်သည်။

0 comments:

 
----------------------------------------- */ /* EOT ----------------------------------------- */